Umthwalo onzima kuMourinho kwiSpurs
Uzobaqonda ngendlela abadlali bale kilabhu
UBHEKENE nomsebenzi onzima wokuxaxamisa iTottenham Hotspur yaseEngland uJose “The Special One” Mourinho owethulwe yile kilabhu njengomqeqeshi omusha ngemuva kokuba ikhombe indlela uMauricio Pochettino obephikwa yimiphumela.
UMourinho ngeke asithole isikhathi sokwazana kahle nabadlali bakhe njengoba ngoMgqibelo iTottenham iqhathwe neWest Ham United kowe-English Premiership ngo-14h30. ISpurs iphoqelekile ukumkhulula uPochettino ngemuva kokunqoba imidlalo emithathu kwewu-12 yokuvula iligi. UPochettino uxoshwa nje, ezinyangeni ezimbalwa ezedlule ufake le kilabhu kowamanqamu we-Uefa Champions League abahlulwe kuwona yiLiverpool nayo yaseEngland.
Kule sizini izinto bezimphika uPochettino njengoba iSpurs ikhishwe yikilabhu encane, iColchester United kwiLeague Cup. Le kilabhu iphinde yangena ehlazweni inenebulelwa ekhaya yiBayern Munich yaseGermany ngo-7-2 koweChampions League.
UMourinho akamusha ebholeni lase-England njengoba enqobe iligi amahlandla amabili neChelsea. Unomthwalo wokusiza le kilabhu isuke endaweni ka-14 ehleli kuyona kwi-log yePremiership.
Ugcine ukusebenza e-England ngonyaka odlule kwiManchester United akhonjwe indlela kuyona ngenxa yokugqoza kwemiphumela. Selokhu ehlukene neRed Devils, ubengaqeqeshi ndawo njengoba ebehlaziya ibhola kumabonakude.
UMourinho usenqobe iligi emazweni amane ehlukene okubalwa kuwona iPortugal, i-England, iSpain ne-Italy.
Lo mqeqeshi uthe ukujabulela kakhulu ukuba yingxenye yale kilabhu. Uthi yinhle ngoba inabadlali abakhaliphile esikimini esikhulu, kanti nakwinkulisa yayo icebe ngenqwaba yabadlali ababukeka beyikusasa layo.
UDaniel Levy ongusihlalo weSpurs, uthi bahlabane ngomqeqeshi wezinga eliphezulu. Uthi imisebenzi kaMourinho izikhulumela yona njengoba enqoba izinkomishi kunoma iyiphi ikilabhu afika kuyona.
Isiyonke imidlalo ye-English Premiership kule mpelasonto ihlelwe kanje: NGOMGQIBELO West Ham United vs Tottenham Hotspur 14h30. Arsenal vs Southampton 17h00. Watford vs Burnley 17h00. Everton vs Norwich City 17h00. Crystal Palace vs Liverpool 17h00.
AFC Bournemouth vs Wolverhampton Wanderers 17h00.
Brighton & Hove Albion vs Leicester City 17h00.
Manchester City vs Chelsea 19h30. NGESONTO Sheffield United vs Manchester United 18h30. NGOMSOMBULUKO Aston Villa vs Newcastle United 22h00.
EyeSpanish La Liga ihlelwe kanje: KUSASA NGOLWESIHLANU Levante vs Mallorca 22h00. NGOMGQIBELO
Leganes vs Barcelona 14h00. Real Betis vs Valencia 17h00. Granada vs Atletico Madrid 19h30.
Real Madrid vs Real Sociedad 22h00. NGESONTO Espanyol vs Getafe 13h00. Osasuna vs Athletic Club 15h00. Eibar vs Deportivo Alaves 17h00.
Villarreal vs Celta de Vigo 19h30. Real Valladolid vs Sevilla 22h00.
EyeSerie A yase-Italy ihlelwe kanje: NGOMGQIBELO Atalanta vs Juventus 16h00. Milan vs Napoli 19h00. Torino vs Internazionale 21h45. NGESONTO Bologna vs Parma 13h30. Hellas Verona vs Fiorentina 16h00. Sassuolo vs Lazio 16h00. Roma vs Brescia 16h00. Sampdoria vs Udinese 19h00. Lecce vs Cagliari 21h45. NGOMSOMBULUKO SPAL vs Genoa 21h45.