MAKHOSI ZULU-ZONDO:
KUYADUMAZA ukuthi kule nyanga, uLwezi (November) izwe lonke liphume inqina likhuza umhlola oyichilo wokuhlukunyezwa kwabesifazane nezingane, izinhlangano ezizimele nezinhlaka zikahulumeni imbala baphakamise izandla bakhuza umhlola ebesingawejwayele kule minyaka yo-1970 kuya ko-1980 yabesilisa abaphenduka izilwane kwabesifazane.
Thina sikhula, isimo senhlalo sasehluke kakhulu kunalokhu esikubona manje. Sikhule neningi labantu besilisa elalikwazi ukusivikela thina njengabesifazane, ngingasayiphathi eyezingane.
Kangisho ukuthi abesilisa beminyaka eyedlule babemsulwa kukhona konke, kodwa izinto sezijiyile manje, sekufike lapho sengathi kusemfashinini kubantu besilisa ukuba basebenzise noma iyiphi indlela ezokwenza ukuba abesifazane bezwe ubuhlungu ngandlelathile.
Kuyiqiniso ukuthi akusibona bonke abesilisa abenza leli hlazo. Kulezi zinsuku siphila phakathi kwabantu besilisa abangenamahloni, abafelwe ngonembeza, abangenandaba nesithunzi sobudoda babo.
Namhlanje siqoma, sithande size sishade nabantu abathi bangamadoda kodwa kabafuni ukusondla, kunalokho bafuna ukondliwa yithina, kabanawo ngisho amahloni okuthi sibakhulisela izingane bekhona bedla anhlamvana.
Okudlula lokho, uma nike nangezwana ngenkulumo - nangabona ngasolinye - kabalesabi ichilo lokuyosimangalela, basivulele amacala okuba sibondle sibe singabesifazane.
Sesingaze siyoma enkantolo impela ebhokisini siyoqula, sishushiselwe ukuthi sondle abantu abasilanda emizini yomkhulu neyobaba bathi bazosinakekela basondle, gwiqiqi, sekuyithina abamangalelwa abathwele icala lokondla! Hhayi lifile elihle kakhulu.
Iningi labesilisa banamhlanje kalikugqizi qakala ukuthi kunezidingo zekhaya okumele ngabe bayazifeza njengobaba bemizi, kodwa lutho zenziwa ngamakhosikazi besengaphezu kwalokho, bahluleke ukuwahlonipha, bawagcwanekele, bawabize ngamagama ayiziswana. Lokhu bakwenza ngisho naphambi kwezingane. Kabawucabangi umonakalo odaleka engqondweni yezingane ezibuka ubaba ongazami lutho lokukhulisa ikhaya, kodwa odelela sona lesi sandla sikamama esimphakelayo.
Abakwenqeni ngisho nokuthuka la makhosikazi, baze bawabeke nezandla izingane zibuka, nazo bazithuke futhi bazibhanqe nonina. Kufike lapho abesifazane bengakwazi okufanele bakwenze ukuze abesilisa babahloniphe futhi babaphathise okwabantu abanengqondo esile, bahlukane nokubabiza ngamagama abenza baphelelwe wukuzethemba.
Sengathi bakwenza ngamabomu ukukhombisa ukuthi owesifazane akayilutho kangakanani. Umuntu ukhohlwa ngisho nawukuthi umzalele izingane ezinhle lapho yena azibuka khona kodwa akungcomfe, akubulale kancane, kancane akudwengule umphefumulo uze ufe uhamba.
Sekwanele bantu besilisa, kushe amazwi kade sikhala, kodwa kinina akuzweli. Siqale sakhala buthule saze saba nesilokozane, safihla imikhuba yenu ngoba sesaba amehlo abantu, sathula savikela ukwehluleka kwenu kodwa lutho anangadela ngathi nezingane zethu esizizaliswe yinina. Namhlanje siyampongoloza siyamemeza sibuza ukuthi ‘sinenzeni kangaka’ kodwa anisizwa namanje. Sekwanele, Sikhathele!