SIGUDLA NOGALAKAJANA
UMA kukhulunywa ngezomjolo kulezi zinsuku, kuthiwa abesilisa bayizinja, kodwa kubukeka sengathi iningi labesifazane yilo elithungatha imigodoyi, inqobo nje uma inemali. Akukhathalekile ukuthi inkotha uyazi kangakanani, uma ungenanyuku ngeke uqonywe.
Ngikhumbula ingoma yomculi wodumo, uShaluza Max, eyayithi: “Wentomb’ unamanga, uyamthand’ utsotsi. Uyisitetelegu ungaka, yimali yamaginsa. Unamanga uyamthand’ utsotsi…” Phela sengathi wayekhuluma nabo laba besifazane banamuhla.
Ayakhala amabhungu athi amatshitshi namajongosi aseqoma amakhehla ngoba nakhu enemali. Amakhehla awasabizwa ngamakhehla, asebizwa ngamablesser. Mhlawumbe kumele sishintshe lesi sisho sesiZulu esithi “ubuhle bendoda yizinkomo zayo”, yiso phela engibona sengathi senza ukuthi izintombi ziqome imali.
Bengixoxa nabafana abangabaculi abangakadumi, nabo bebekhala ngayo le nto yabesifazane abajola nomnotho. Bathi zonke izintombi zifuna ukuba ngophumalangasikothe bokwakhiwa, lokhu okuthiwa ama- slay queen. Phela ubuhle bomuntu wesifazane sebuyakhiwa kulezi zinsuku. Umane ufake izinwele ezakhiwe ngomsila wehhashi, ugcobise obhekeni phawoda nocurry phawoda, bese upenda ubuso lapha nalaphaya, ube usuphenduka isimomondiya kalula kanjalo.
Abanemali noma abanamablesser anemali, bona bathenga izinwele zamaNdiya nezabantu baseBrazil, Peru namanye nje amazwe anabantu abanezinwele ezinde. Lapho-ke kuthiwa ukhipha izinkulungwane ngezinkulungwane zamarandi.
Kanti abantu abantulayo kulawo mazwe bayazithengisa ukuze bathole okuya ngasethunjini. Kusho ukuthi umuntu uhamba enepulazi ekhanda, uyakhulisa uyavuna nje njengabo bonke abalimi. Kuthiwa ama- slay queen aphatha amakhehla ngamabili, ngamathathu.
Kukhona elikhipha imali yezinzipho zokufakelwa, kube khona elezinwele, kube futhi nelemali yezimpahla neyokugruva njalo njalo. Uthola nawo la makhehla esezimpintshe ngamabhulukwe entsha awobhotsotso, esho ngontabakayikhonjwa bemikhaba, umuntu esefana nochatho lolu luka- size 10. Yize le nto eyenziwa yila makhehla iyihlazo, kodwa abesifazane yibo abazilahlela kuwo, ngakho nabo kumele balivume iqhaza abalibambayo ekuxhashazweni kwabo.
Kabekho msulwa kukho konke lokhu, zikhona izinsizwa ezingenamali, ezizifunela uthando nje olungaxutshwe nasawoti, kodwa kazibukwa ngisho nokubukwa lokhu. Uma intombi ilandela imali, nayo izoxhashazwa njengayo inyuku leyo ngoba phela amablesser kawayihloniphi imali, kanti nawe ngeke akuhloniphe.
Uma nawe ungulowo muntu, akumele-ke ukhale ngokuthi uyaxhashazwa ngoba uye lapho wazi kahle kamhlophe ukuthi uya kumuntu onjani.
Uzifunele futhi wazitholela inja yakho. Inja leyo yakho kayisoze yaphenduka ikati noma inkukhu.
Kukhona nabanye abalandela abaculi okuthiwa ngama- groupie.
Laba bantu besifazane baya emakhonsathini bafike bafune ukungena ngemuva kweshashalazi, phecelezi backstage. Uma belapho bazimisele ngokulala nanoma yimuphi umculi okhona.
Abanye baze bathole nokuthi abaculi bakuliphi ihhotela, baye lapho, bazinikele okwezimbuzi zomhlatshelo.
Esontweni eledlule bengicelwe ngenye yamabhendi abelungu ukuba ngiyoyidlalela ekhonsathini yayo. Sithe uma siqeda ukudlala ngobusuku bokuqala, ngabashiya bephuzaphuza, ngaya egunjini lami, ngiyophumula. Ngithe ngingakaqedi ngisho nokugeza, ngezwa kungqongqoza umuntu emnyango.
Ngithe uma ngiyobheka, ngathola amantombazanyana amathathu emi emnyango. Uma ngiwabuza ukuthi ngingawasiza na, athi azongichithiza isizungu, angibuza nokuthi kungani ngisheshe ngahamba ephathini.
Ngiwatshele ukuthi mina sengizikhulele, ngakho ngiyadinga ukuphumula ngoba phela besiyodlala ubusuku obuthathu.
Enye ithe mangiyeke ukuzigugisa ngoba ngise- fresh. Ububona nje ukuthi lezi zingane zisahamba isikole noma zisanda ukuqala inyuvesi.
Amakhehla awasabizwa ngamakhehla, asebizwa ngama-blesser.