UMASIPALA UMTHONJANENI AWULUBHADI KUMA-SALGA
INTSHA yaseMthonjaneni ngaphansi komkhandlu iKing Cetshwayo ihlelelwe indumezulu yomqhudelwano webhola lezinyawo ukugubha izinsuku eziwu-16 zokulwisana nokuhlukunyezwa kwabesifazane nezingane.
Le midlalo izokuba ngoMgqibelo ku-ward 11 e-Upper Nseleni.
I-16 Days of Activism for No Violence Against Women And Children iqale ngomhla ka-25 kwephezulu kanti izosongwa ngomhla ka-10 kuZibandlela (December).
ILANGA lithole ukuthi uMthonjaneni ngeke ube yingxenye yamaSalga Games azoqala mhla ka-12 kwezokwethwasa asongwe mhla ka-15 eThekwini.
ULindo Phungula oyisekela meya eKing Cetshwayo, ukuqinisekisile kuleli phephandaba ukuthi uMthonjaneni ngeke ulibambe iqhaza kumaSalga Games anonyaka.
“Kuyiqiniso ukuthi uMthonjaneni ngeke ube yingxenye yamaSalga Games nonyaka. Ngenxa yokuthi intsha izokube ingeyona ingxenye yamaSalga, uMthonjaneni uthathe isinqumo sokuba uyihlelele imidlalo lapho izoveza khona amakhono ayo.
"UMthonjaneni kawunankinga namaSalga kodwa uthathe isinqumo sokuba ungabi yingxenye yawo nonyaka.
“AmaSalga enzeka kanye ngoZibandlela kanti uMthonjaneni uzwakalise ukuthi uzimisele ukuba nemidlalo njalo ukuze intsha izokwazi ukuveza amakhono ayo.
"Siyazi ukuthi intsha eningi isale ngaphandle njengoba kunebhola kuphela kulo mqhudelwano wangoMgqibelo. Ekuqaleni konyaka kuzokuba neminye imidlalo efuze lena lapho kuzofakwa khona neminye,” kusho uPhungula.
Ukuqinisekisile ukuthi wonke amawadi abo awu-13 azokube emelwe kulo mqhudelwano. Uthi izingqwele zizohlomula ngenkomishi ehambisana nejezi kanti bonke abazobamba iqhaza bazothola imithobanhliziyo.
Usuku lokuvula imidlalo yamaSalga ngumhla ka-12 lapho kulindeleke khona ukuba bonke omasipala besifundazwe baphelele khona. Kuzokwenziwela eNorth Beach.
KumaSalga kuzoncintiswana emidlalweni ewu-16. Phakathi kwayo kukhona ibhola lezinyawo, ithenisi, ibhola lombhoxo, amankomane, i- table tennis, i- chess, umkhalambazo, umdanso, ukubhukuda, i- basketball, i- volleyball, i- indigenous games, ezokugijma i- cricket nebhola lomnqakiswano.