Kuqhilika izihlathi kozomela iSA eNigeria
Ungene kwezokugijima ephoqwa nguthisha wakhe, engafuni
KUQHILIKA izihlathi kumsubathi waKwaZuluNatal uSanelisiwe “Lion King” Mbanjwa osubathela iPhantane Athletics Club emuva kokuqokelwa ukuyomela iNingizimu Afrika kwi-International Association of Ultrarunners (IAU) African 50km Championships mhla ka-7 kuZibandlela (December) eSagamu, eNigeria.
USanelisiwe ungomunye wabasubathi abalikhuphule kakhulu izinga kulezi zinsuku. Uqokelwa kulesi sikwati nje, usanda kushaqisa abaningi engena endaweni yesine kwiSoweto Marathon ebingasekuqaleni kwale nyanga uLwezi (November). Wenze isikhathi esiwu-2:53 kulo mjaho onqotshwe ngu-Irvette van Zyl esigabeni sabesifazane.
Izindaba zokuqokwa kukaSanelisiwe ziqinisekiswe yimenenja yakhe, uMthandeni Nene. Lo msubathi uqale ukuzihlanganisa nezokugijima ngo-2009 enza uGrade 12 eKhalina Secondary School, eNorthdale, eMgungundlovu. Nokho uqale ukugxila kulo mdlalo ngokugcwele ngo-2017.
Ngaphandle kokwenza kahle kwiSoweto, miningi imijaho ayigijime kahle nonyaka kubalwa iPrince Mangosuthu Ultra Marathon (52km) lapho enza khona u-3:49 wabe esengena endaweni yesithathu, kanti kwiZululand District Ultra Marathon waphuma unombolo 10 ngesikhathi sika-3:16. KwiMandela Day Marathon ungene unombolo 3 ngesikhathi esiwu-3:03.
Ekhuluma neLANGA uSanelisiwe, uthe ujabule kakhulu ngokuqokelwa ukuyomela izwe. Uthi uyaqala ukumela elakuleli yize eke wayimela iKwaZulu-Natal kwiCross Country enza i-10km.
“Ngijabule kakhulu ngokuqokwa kwami ukuyomela izwe. Nokho bengingalindele kwazise ekugijimeni ngifakwe nguthisha wami ngenkani, ngingafuni. Ngikhule nginenkinga yamathambo abengigulisa ngendlela eyisimanga kodwa ngithe uma ngiqala ukungena kulo mdlalo izinto zashintsha. Kusukela ngiqalile ukubamba iqhaza kwezokugijima sekufana nomlando ukuthi ngike ngaba nenkinga yamathambo,” kusho uSanelisiwe.
Uthi yize azi ukuthi uzokube ebhekene nabasubathi abaningi abahlonishwayo emhlabeni kodwa uzimisele ngokwenza kahle eNigeria ukubeka izwe lakhe ebalazweni. Ubonge kakhulu i-Athletics South Africa (ASA) ngokubona ikhono kuyena. Ubonge nekilabhu yakhe iPhantane nemenenja yakhe, uNene.
I-ASA ithe umqeqeshi wesizwe kuzokuba nguXolani Mabhida ozakhele udumo elolonga uBongumusa Mthembu onqobe iComrades Marathon amahlandla amathathu kanti imenenja nguDana Coetzee. Umengameli we-ASA u-Aleck Skhosana, uthe unethemba lokuthi iqembu lesizwe lizokwenza kahle eNigeria.
Selilonke iqembu lakuleli eliya eNigeria lididiyelwe kanje, kwabesilisa: uThobile Mbolekwa, uMthokozisi Mazibuko noNtshindiso Phakathi. Kwabesifazane: uLeilani Scheffer, uRamadimetja Babili noSanelisiwe.