ITHOLE INKUNDLA SEKUVALWE AMEHLO EQHWAKELE KWI-MOTSEPE
KUCISHE kwabhuntsha umdlalo weDabeka Sporting ihluleka ukuthola izinkundla ezimbili ejwayele ukuzisebenzisa ukugijimela kuzona imidlalo yayo yasekhaya yeSafa KZN ABC Motsepe League.
ISporting ehamba phambili kwilog yalesi sigaba ngamaphuzu awu-25, ihlelelwe umdlalo onzima weligi neMilford FC esazama ukulungisa izinto kwazise iyiqale kabi le sizini. Esicongweni iDabeka ibekwe emhlane wuMvoti FC.
USunshine Ngwane ongomunye wabanikazi beSporting, utshele ILANGA ukuthi ucishe wahlehliswa umdlalo wabo neMilford kwazise eKK Stadium kunomcimbi okhona ekubeni bahlulekile nokuthola iSugar Ray Xulu Stadium. Zombili lezi zinkundla ziseClermont.
Nokho uthi babe nenhlanhla bevunyelwa ngabanikazi be-Edgewood Sports Grounds ukuba basebenzise enye yezinkundla zakhona. Uthi babonga neSafa ngokubazwela kulesi simo abebebhekene naso. Uthi unethemba lokuthi bazothola amaphuzu agcwele kulo mdlalo.
“Ngiyaziqhenya kakhulu ngabadlali esinabo kule sizini. Abadlali abanjengoJabulani Nene benza umsebenzi womqeqeshi uSheldon Roux ubelula kakhulu. Nginezinhloso zokubona le kilabhu inyukela kwiGladAfrica Championship ngesizini ezayo. Kangifuni ukuba siyodlala imidlalo yokuhlunga bese siyabuya,” kusho uNgwane.
Kuzo ezalesi sigaba, iPondo Chiefs egijima kwiSafa Eastern Cape ABC Mostepe League ingase iqashe uTshepo Motsoeneng njengomqeqeshi wayo omusha emuva kokukhomba indlela u-Asanda Mvalo oke waqeqesha iThanda Royal Zulu. INatal United yona igcine ithathe uKayikayi Mhlungu njengomqeqeshi wayo omusha ngemuva kokunqaba kukaSmart Ndlovu ukuba yingxenye yale kilabhu ezinze eMayville.
Isiyonke imidlalo yeSafa KZN ABC Motsepe League engempelasonto ihlelwe kanje:NGOMGQIBELO EFNB Wadley Stadium: Movers FC vs Happy Wanderers 13h00.
E-Edgewood Grounds: Dabeka Sporting vs Milford FC 15h00.
EDarnall Stadium: Qwabe United vs X1 Experience 15h00.
ENgced’ Omhlophe: Muzi King Masters vs GWP Friends 15h00.
EKing Edward Stadium: UMvoti FC vs Edendale Juventus 15h00.
KwaMsane Grounds: Natal Rich Boys vs Durban FC 15h00.
EHoward College Gate 10: Natal United vs Zululand Warriors 15h00.
E-Eastbury: Rainham Sporting vs Summerfield Dynamos 15h00.