Izibalo nocwaningo ngeBlack Friday

Ucwaningo luveza ukuthi intsha iyazifela ngalolu suku kunasebekhulile

KUSASA ekuseni siyasuka leso siphithiphithi saminyaka yonke sokunyathelana nokududulana kwabathengi nolayini abade ezitolo njengoba kuzobe kuyiBlack Friday.

Iningi imali ezochithwa ezitolo ezahlukene njengoba kunenkolelo yokuthi imikhiqizo eminingi isuke ibuthwa phansi ngalolu suku. Isasasa lalolu suku imvamisa lihambisana nokutatazela okuyisimanga nexhala elenza abantu bagcine bethenga nezinto abangazidingi.

I- website i- www.finders.com ithi kulo nyaka bawu-42% kuphela abantu abakhombise isasasa lokuya ezitolo kusasa. Kulezi zibalo intsha ebizwa ngeGeneration Z (okuyileyo ezalwe kusuka ngo-1995), yiyona ekhombise intshisekelo yokuthenga.

Kuthiwa yize abaningi abathengi besancamela lowo muzwa wokuvuka kusempondozankomo beyoma ulayini omude, baphinde badudulane ezitolo, u-39% uthe wona uncamela ukuthenga

online. Phakathi kwezizathu abazishilo, bathe wukungezwani nesiphithiphithi kanjalo nokuma isikhathi eside kolayini.

Kubuye kwavela nokuthi u-65% wabathengi baseNingizimu Afrika basakholelwa kakhulu kwiBlack Friday, ikakhulukazi intsha bese kuthi labo asebekhulile bangakholelwa kakhulu kuleli sasasa njengoba kunabanemibono yokuthi intengo isuke ivele inyusiwe bese kuthi ngalolu suku bayibuyisele enanini langempela - okwenza kubukeke sengathi kunemititilizo. UCWANINGO NGOKWEZINDAWO

Nakuba umsuka walolu suku unomlando ongemuhle njengoba lumataniswa nokwenziwa izigqila kwabantu abamnyama eMelika, muva nje sekuwusuku lokukhithiza ezitolo.

Ngokwezibalo zeSEMrush, kumanje iBrazil yiyona ehamba phambili njengezwe elisenesasasa lalolu suku njengoba minyaka yonke zikhula izibalo zokuthengwa kwemikhiqizo. Ezithendeni zayo kuba yiFrance kulandele iGermany. Kuthiwa iNingizimu Afrika ingunombolo 22 emazweni asenentshisekelo ye-Black Friday, izibalo zakhona ezenyuke ngo22% uma uqhathanisa kusuka ngo-2016.

E-Gauteng: Kuthiwa u-46% wabantu abebeyingxenye yalolu cwaningo, uthe uzothenga online kwathi u-16% wathi uzobe ume kolayini. U-11% wona uthe kawunandaba nokuyolala eminyango yezitolo ulindile.

E-Western Cape:

Bawu-15% abathengi abaveze ukuthi bazoziyela siqu ezitolo beyolinda kolayini usuku lonke kwathi enye ingxenye yancamela ukuthenga online.

I-Eastern Cape: yiyona eluhudulela izinyawo lolu suku kangangokuba inqwaba yakhona ithi kayisiboni isidingo salo msindo ngeBlack Friday.

Ingxenye enkulu yalaba abebemanqikanqika besola abanini bezitolo ngokukhuphula intengo, baphuma kulesi sifundazwe. Yilezi zifundazwe kuphela ezibalulwe njengezibe yingxenye yalolu cwaningo.

IZITOLO EZIYIZINTANDOKAZI NGALESI SIKHATHI

Lolu cwaningo luphinde lwaveza ukuthi izikhondlakhondla zezitolo uGame, uMakro neTakealot yizona ezihamba phambili ngokwenza inzuzo ngalesi sikhathi.

IIZTHOMBE NGABE: PINTEREST NABEFLICKR.COM YIZIKHANGISO nemibhalo efana nalona eshiya abathengi belangazelela ukuyobutha imikhiqizo abayidingayo kokunye abangayidingi ngoba bekholelwa ukuthi icoshwa phansi. Ucwaningo luveza ukuthi iNingizimu Afrika iwunombolo 22 emazweni asenesasasa leBlack Friday kanti lukhona nocwaningo olwenziwe ezifundazweni ezahlukahlukene zakuleli ukuzwa ukuthi ithakaselwa kangakanani phakathi kwentsha nasebekhulile iBlack Friday.

EMUVA kokulala ngaphambi kwezitolo abathengi belinde kushaye isikhathi sokuvula, kuphushwana kanje sekubangwa. Uma untekenteke kungcono uthenge online ngoba kulula nokuba ulimale.