UMNDENI UKHONONDA NGEFAYELA ELIDUKILE
UVUTHA ungabaselwe umndeni waKwaMpumuza, eMgungundlovu, ngokudlaliswa umacashelana yisibhedlela sase-Edendale, khona eMgungundlovu, mayelana nokuduka kwefayela lengane enamasonto awu-5 ubudala, okwashona unina izalwa kusetshenziswa izindlawu, yalimala kanzima ekhanda, kwaphoqeleka ukuba iyiswe egunjini labagulayo.
ILANGA langomhla ka-15 kuNhlangulana (June), labika ngodaba lukaNkz Lindelwa Nyandu (22) owashonela esibhedlela i-Edendale ebeletha, umndeni wakhe wasola “izimfundamakhwela” ezazimbelethisa okuthiwa zasebenzisa izindlawu, zaphuma nesibeletho, wopha kanzima kwagcina kumenele.
Umndeni kawugculisekanga ngendlela othi wachazelwa ngayo ngokushona kukaLindelwa.
Unina omncane kamufi, uNkk Thembelihle Nyandu, uthi sebephinde bahlangabezana nenye imbibizane njengoba sekulahleke ifayela lengane yakhe (umufi).
“Njengoba ingane seyiphumile esibhedlela, siyalelwe ukuba siyihambise emtholampilo oseduzane kanye ngenyanga ukuze kubhekwe ukuthi ilulama kahle yini.
“NgoLwesithathu (oludlule) siyihambise emtholampilo, i-East Boom Community Health Centre, udokotela wacela ifayela layo ukuze abone ukuthi yayilimele kuphi.
“Usiyalele ukuba siyocela ikhophi yalo esibhedlela ngoba kuzoba nzima kuyena ukusiza ingane engaboni umfanekiso okhombisa lapho yayilimele khona ngesikhathi ibelethwa.
“Esibhedlela besehliswa senyuswa emahhovisi obekuthiwa masilicele kuwona (ifayela), laze lashona ilanga lutho ukutholakala, kwagcina kwenziwe elisha. Kuyasolisa ukulahleka kwelidala ngoba siwumndeni besifuna licutshungulwe kahle ngoba lihlobene nokushona ngendlela enobudedengu kukanina wale ngane,” kusho uNkk Nyandu.
Okhulumela uMnyango wezeMpilo KwaZulu-Natal, uNkk Noluthando Nkosi, uthe udaba uzolulandela ngokuxhumana nasebenzisana nabo ehhovisini lezokuxhumana emnyangweni.