UTHI UZOYISUKUMELA EYESITELEKA SE-NEHAWU
UTHEMBISA ukulusukumela phezulu udaba lwesiteleka esihlongozwa yinyunyana yezisebenzi zawo uMnyango wezeMpilo njengoba iNational Education, Health and Allied Workers’ Union (Nehawu) ithi amalungu ayo azodinsila amathuluzi ngenxa yokuthi kunezidingo zezisebenzi zezempilo ezingabhekelelwa, ikakhulukazi kulesi sikhathi sokuhlasela kweCovid-19.
Lesi sethembiso senziwe nguNgqongqoshe wezeMpilo, uDkt Zweli Mkhize, izolo ngoLwesithathu emuva kokuba ngoLwesibili iNehawu ifunge ngokuthi izobhikisha.
Le nyunyana ikhala ngokuthi umnyango ukhombisa ukungazikhathaleli izisebenzi zawo njengoba zisebenza ngaphansi kwezimo ezibucayi. Ithi ihlongoza ukuthi kusukela ngomhla ka-21 kuNcwaba (August), izisebenzi zalo mnyango ezingamalungu ayo ziqale zihoshe izinyawo bese ziyofaka izicelo zokuhlaba ikhefu emsebenzini.
Ithi uma ushintsho lungabonakali, kusukela ngomhla ka-24 kuya kumhla ka-27, izisebenzi zizohosha izinyawo.
UMnu Zola Saphetha, ongunobhala-jikelele weNehawu, uthe phakathi kwezinto ezibaphethe kabi wukunyuka kwesibalo sezisebenzi ezihaqwa yiCoronavirus, okubonakala sengathi umnyango kawunandaba nakho njengoba kwezinye izikhungo kuseyinkinga ukutholakala kwezivikeli.
Uthi okunye abaphinde bakuthola wukuthi kunezindawo lapho izisebenzi beziphoqwa ukusebenza ngisho sezitholakele ukuthi zinaleli gciwane.
Nangesonto eledlule ILANGA like labika ngelaka lezisebenzi zomtholampilo oseNanda, lapho abanye babahlengikazi bebekhala ngokubekwa engcupheni yokutheleleka ngeCoronavirus ngokusetshensizwa bengasazi isimo semiphumela yabo ngemuva kokuhlolwa.
Laba bahlengikazi bahlolwa ngemuva kokugula kwathi ingakabuyi imiphumela, batshelwa ukuthi mababuyele emsebenzini, bathola sebesenza ukuthi imiphumela ithi bahaqekile.
INehawu ikhala ngokuthi ziningi izimo ezikhombisa ukucindezela izisebenzi, ezenza izimo ezisebenza ngaphansi kwazo zibe yingozi kuzona.
UDkt Mkhize uthe njengomnyango bazozisukumela izikhalo zale nyunyana, baqinisekise ukuthi izisebenzi zizizwa ziphephile ngokukhulu ukushesha.
UMnu Tshepo Makhetanyane, ongumgcinimafa weNehawu, uthe kabakwazi ukukholwa ngokushiwo nguDkt Mkhize, kepha bazokholwa ngokubona.
“Uma bezokwazi ukusinika esikufunayo, ngeke siqhubeke nesiteleka,” kusho uMnu Makhetanyane.