BAZOFIHLWA KUSASA OSAZIWAYO
BAFIHLWA kusasa ngoLwesihlanu eThekwini osaziwayo ababili bakuleli dolobha, okunguMnu Thokoza Lawrence Msomi (70), obengumholi weqembu lomculo, iThe Challengers, noMnu Mandla Buthelezi (65) owayesebenzela uKhozi FM, obeseyisikhulu sezinhlangano zohwebo KwaZuluNatal.
UMnu Msomi - obeyiKhatholika lokuqina - ushone ngoMsombuluko kanti uzofihlwa emathuneni aseMariannhill Monastery, eMariannhill, emuva kwenkonzo ezoba semzini wakhe, kwa-E1282, eMlazi, kusukela ngo09h00.
Indodakazi yakhe, uNkz Sibahle Msomi, ithe uyise ushonele esibhedlela emuva kokugula isikhathi eside ephethwe yizifo eziyamene nesifo sikashukela.
UMnu Msomi uzakhele udumo kusuka eminyakeni ka-1980 lapho okwathi eyiphoyisa lomgwaqo kuMasipala weTheku, wabumba iThe Challengers, eyashisa izikhotha ngengoma ethi, “Eloyi”, esebenza nenkakha, uMnu Roxy Jila.
Ubezidlalela yena ama- keyboard kanti ukhiphe ama-albhamu angaphezu kweshumi.
Bazoyikhumbula abanye insizwa ebifunda isibikezelo sezulu kumabonakude kuSABC engasekho, uJabu “oKumhlophe” Sithole, nayo yaphuma ezandleni zakhe, icula kwiThe Challengers. Ithemba lamaKhatholika, Omama Benqaba yamaKhatholika ngamanye amaqembu ayimikhiqizo encomekayo kaMnu Msomi.
Ushiye owakwakhe, uNkk Sibongile Msomi (MaSithole) nabantwana abawu-7.
UMnu Buthelezi yena ushonele kwakhe eWoodlands, eThekwini, ngoLwesihlanu emuva kokukhala ngamahlaba isikhashana wabe esethula.
Ngokusho komkakhe, uNkk Fikile Buthelezi (uMaMchunu), uzofihlwa emathuneni aseLalakahle ngaseHillcrest emini emuva kwenkonzo ezoqala ngehora le-10 kwakhe.
UMandla - njengoba ebebizwa kanjalo - ubengowokuzalwa eNkandla. Uke waba nguthisha ezikoleni ezimbalwa KwaZuluNatal. Kwathi ngezikhathi kuqala isiteshi sikamabonakude eSABC, eGoli, waba ngenye yezintatheli zaso, wasishiya wayosebenza emkhakheni wezindaba oKhozini FM lusabizwa ngeRadio Zulu.
Wasuka lapho wangena kwezolimo ngaphansi kwenhlangano eyabe ibizwa ngeKTT eMariannhill. Akabange esabheka emuva, njengoba ubesengusihlalo wezinhlangano ezimbili zezohwebo, iNafcoc neNafo, ezisathuthukisa isizwe nakwezolimo namabhizinisi.
Ushiye owakwakhe, amadodakazi amathathu nabazukulu abathathu.