Izakhamizi zibanga amanzi nezinkomo
Basola inkampani ephucwe ithenda ngokulinyazwa kwengqalasizinda
KUSOLWA inkampani okuthiwa iphucwe ithenda yokuphakela uMasipala waseMlalazi, eShowe, amanzi - ebisiyenze lo msebenzi iminyaka ewu-17 - ngombhikisho osuqede isikhathi esingaphezu kwenyanga, kwalinyazwa nengqalasizinda yamanzi, okwenza umphakathi ugcine usuwabanga nemfuyo emaxhaphozini nasemifuleni.
ILANGA liziyele mathupha ezindaweni ezakhele lo masipala lafika siphezulu isililo emiphakathini ngokubanga amanzi nemfuyo. Sesiside isikhathi kunabantu ababhikishayo, bavale umgwaqo u-R66 neminye eseduze nedolobha laseShowe.
Njengoba uhulumeni ugqugquzela ukuhlanzeka njengoba kubhoke iCovid-19, abanye babantu abangaphansi kwalo masipala bayakhononda ngenxa yalesi simo. Isililo sikhulu kakhulu ezindaweni zasemakhaya.
UMnu Siyabonga Shandu, oyilungu lomphakathi waseSamungu, eShowe, uthi uma ungenayo imali yokukhokhela imoto ezothutha amanzi, kuyakuphoqa ukuba uphuze nezinkomo emaxhaphozini.
“Into ebuhlungu wukuthi emakhaya kuhlala izalukazi kakhulu, bangcono abasedolobheni ngoba amakhansela abo ayababikela (ngezinkinga zamanzi), thina ngapha sibona kuthule nje, akekho ositshelayo ukuthi kwenzekani,” kusho uMnu Shandu.
Uthi bakhokha u-R250 uma befuna ukulandelwa amanzi.
UNkz Nomvula Sithole, ILANGA elimfice emfuleni, iMatigulu, ewasha nezingane zakhe - uthe imoto okumele ibahambisele amanzi ibabiza u-R500 ukubachathekela wona ethangini likaJojo.
“Uma ungenayo imali, ngeke ube nawo amanzi. Kungcono khona ukuqasha imoto ngoba kushibhile. Impilo yethu sasesithi ishintshile ngesikhathi kungena ompompi emakhaya kanti kasazi ukuthi uhulumeni usinunusela ngeqatha emlonyeni,” kusho uNkz Sithole.
Khona futhi eMatigulu ILANGA lihlangane noNkk Cebile Ncanana othi okubi wukuthi kabazange baziswe ngokuphela kwamanzi.
“Besizitshela ukuthi ayabuya njengenjwayelo. Sithukile uma sekuhamba isikhathi engabuyi njengoba eseqede inyanga singenawo,” kusho yena.
UNkk Thandekile Xulu, waseHabeni, odondolezayo, uthi kunzima kakhulu uma izingane zakhe zingekho ngoba uma efuna amanzi okuphuza, kumele aye exhaphozini, okunzima nakuyena ukufika kulona.
“Bakhona abawatholayo amanzi, kodwa kithina ngapha eHabeni kawafiki, aphelela eMlalazi,” kusho uNkk Xulu.
Uma uhamba eHabeni, ukhangwa wumlotha wamathayi emigwaqweni, ekhombisa ukuthi imibhikisho isifana nesiko.
UMnu Sphamandla Zulu, naye oyilungu lomphakathi, uthi: “Imeya namakhansela ayo bahlulwa wumsebenzi olula wokwazisa abantu ukuthi kwenzekani. Sekuphele inyanga sibhekene nalesi simo. Ngemuva kombhikisho abuyile kancane amanzi aphinde ahamba,”
UMnu Zulu uthi ukube umasipala uyabatshela abantu ukuthi kwenzekani, ngabe kawukho umbhikisho. Kuyona le ndawo kunabantu okubikwa ukuthi sebelahlekelwe yimisebenzi ngoba njalo uma beya emsebenzini, bayavinjwa.
“Ngingomunye wabantu abangasasebenzi ngenxa yalo mbhikisho. Uma usukile akuyeki oNdini noma eThekwini ngoba bavala wona lo mgwaqo omkhulu okumele kuhanjwe kuwona,” kusho uMnu Zulu.
UMnu Vusi Mahaye, okhulumela uMasipala wesiFunda iKing Cetshwayo - okuyiwona ophathiswe umsebenzi wokuhlinzeka ngamanzi umphakathi wamankonyane awo, okungomasipala abancane okubalwa nawo owaseMlalazi - uthi ukuphuca kwabo iWater and Sanitation Services South Africa (Pty) Ltd (WSSA) inkontileka yokuhlinzeka umphakathi ngamanzi kule ndawo, yikho okubadonsele amanzi ngomsele.
Uthi le nkampani yiyona enqamula amapayipi kanti iningi labantu ababhikishayo abantu abebeyisebenzela.
“Le nkampani ibinezisebenzi eziwu-500, ezinye ziqashwe ngobuhlobo. Kuthe uma umasipala usuzibambela umsebenzi ngokubona ukuthi iningi imali oyikhokhayo, wacela izisebenzi ebezisebenzela le nkampani ukuba zifake izicelo kabusha.
“Ezinye zithathiwe, kodwa ezinye bezingakulungele ukuqashwa wumasipala, yizona-ke lezo ezigqobhoza amapayipi bese kuphazamiseka ukuhanjiswa kwamanzi emphakathini,” kusho uMnu Mahaye.
Uthi iWSSA iyehluleka wukuchazela izisebenzi zayo ngokwenzekayo bese zona zilwa nomasipala.
“Lezi zisebenzi ezidiliziwe ziyiwona futhi amalungu omphakathi‚” kusho uMnu Mahaye.
Uthi okunye okwenza amanzi bangabi nawo wukuthi ngemuva kokushintsha le nkampani, babonile ukuthi amanzi eMhlathuze Water kawahambi ngokushesha njengawoMngeni Water.
“Kusukela ngomhla ka-1 kuNtulikazi (July), amanzi besingenawo kuMasipala waseMlalazi ngoba uhlelo lwethu sifuna lufinyelele nasezindaweni ezikude, yingakho sisebenzisa uMngeni Water,” kusho yena.
UMnu Mahaye ugxeka amakhansela, izinduna namakhosi emiphakathi engenalo ulwazi lokuthi kwenzekani ngodaba lwamanzi.
“Ngaphambi kokuba kunqamuke amanzi, sabiza bonke ubuholi bomphakathi, sabubikela ngokuzokwenzeka, bona umsebenzi wabo kwakumele bayobikela umphakathi” kusho yena.
Uthi abadayiselwa amanzi yizimoto, kumele bazicebe ukuze kuzothathwa izinyathelo.
“Izimoto zamanzi kazivumelekile ukuya emizini yabantu, kodwa bakhona oJojo esibabekile izindawo ngezindawo lapho abantu bezovonxa khona,” kusho yena.
ILANGA libabonile labo Jojo uMnu Makhaye akhuluma ngabo.
Uthe amanzi asebuyile kwezinye izindawo, wathembisa umphakathi ukuthi bonke abantu bazowathola maduze ngoba konke sekulungile.
Umnikazi weWSSA, uMnu Dumisani Luthuli, uthe indaba yabo nomasipala isisenkantolo.
“Besivele sikulindele ukuphela kwenkontileka, ngeke silwe ngalokho. Into esiyilwelayo yisivumelwano esasisayina ngo-2013 nomasipala sokuthi uma inkontileka yethu iphela, izisebenzi zizoqhubeka nalowo ozoqashwa,” esho.
“Uthi umasipala kawukwenzanga lokho. Uphike walala ngomhlane ukuthi yizisebenzi zakhe ezinqamula amapayipi amanzi.