USIZI LWAMANZI ENKUNDUSI
USOLA abashayeli bamaloli abathuthela umphakathi amanzi ngokohlelo lukamasipala ngokuchathekela iziceke emathangini, kuphele izinyanga bengabuyeli ukuyothela amanye umphakathi waseNkundusi, eMtubatuba, othi indlala yamanzi idala ukuba uhambe amabanga amade uyowafuna emfuleni iHluhluwe, oyingozi.
UNkz Lungile Gumede, oyilungu lomphakathi, uthi kuthatha ihora lonke ukuya nokubuya kulo mfula, kanti amanzi akhona babuye bawabange nezilwane.
Uthi usizi lwabo lubuye lunezelelwe yisenzo sabashayeli bamaloli kamasipala, abathelela iziceke emathangini.
“Sisenkingeni lapha eNkundusi, sinompompi osekuphele isikhathi eside bafakwa, kodwa namanje kawekho amanzi.
“Siyacela kumasipala (waseJozini) ukuba ungenelele osizini lwethu ngoba nekhansela lethu liyasibalekela, kalifuni ukuhlangana nathi ukuze ilungiswe le ndaba. Sihamba ibanga elide kakhulu uma siyofuna amanzi emfuleni iHluhluwe onezingwenya eziyingozi kubantu.
“Kumanje kunalesi sifo esikhona (Covid-19), kuthiwa masihlale ngokugeza izandla kodwa amanzi kasinikwa,” kusho uNkz Gumede.
UMnu Khumbulani Tembe uthe: “Okwalapha eMzinyeni kuyadabukisa ngoba kungamakhilomitha awu-25 ukusuka lapha uya edanyini lamanzi eJozini okufanele ngabe sidonselwa kulona amanzi afike lapha endaweni.
“Sicela umasipala ungenelele osizini lwethu, kukhuzwe nabashayeli bamaloli bayeke ukuthengisa ngamanzi. Namakhansela mawayeke ukunika abangani bawo amanzi ngoba konke lokhu siyakubuka.”
USomlomo kaMasipala waseJozini, uMnu Nkosinathi Myeni, uthe indaba yamanzi ihlasele izindawo zaseJozini, kodwa nawo umasipala kukhona okuzamayo ukubhekana nalesi simo.
“Sithenge iloli ukuba lihambisele abantu amanzi, safaka nezigayo ( boreholes) kwezinye izindawo. Lokhu sikwenza ngenhloso yokulekelela umasipala wethu wesifunda uMkhanyakude,” kusho uMnu Myeni.
IMeya yaseMkhanyakude, uMnu Solomon Mkhombo, ithe kuyiqiniso elingephikwe muntu ukuthi inkulu inkinga yamanzi kuzona zonke izindawo zomasipala wayo.
Ithe nakuba ikhona le nkinga, kodwa ziningi izinhlelo umasipala ophezu kwazo ukuyilungisa.
Udaba lwaseNkundusi ithe iyalwazi, kodwa kunemizamo yokudonsa amanzi esikimini saseHluhluwe.
“Siyacela ukuba umphakathi ubekezele, udaba lwawo luyalungiswa. Siyethembisa nokuthi sizoyilungisa inkinga yabashayeli bethu athela amanzi angagcwali emathangini.
“Nalabo okubikwa ukuthi bayawathengisa, sizobabamba kungekudala,” kusho uMnu Mkhombo.