Uveze ukukhathazeka ngezinhlaka zentsha
UMnu Ntombela uthi izwi lentsha livaleleka ngaphandle
UKHATHAZWA wukungabikhona kohlaka oluqondile lwe-ANC Youth League (ANCYL), uMnu Nhlakanipho Ntombela, oqokwe njengomkhulumeli weANC KwaZulu-Natal, okuyisikhundla esivuleke emuva kokudlula emhlabeni kukaMnu Ricardo Mthembu osanda kufihlwa.
UMnu Ntombela oyilungu lesiShayamthetho saKwaZuluNatal, umenyezelwe ngoLwesibili kulesi sikhundla.
Ukhulele kwi-ANCYL njengoba waqhoqhobala izikhundla ezahlukene kuyona, wagcina esengusihlalo wayo kulesi sifundazwe. Waba nguSihlalo weYouth Commision okuyiyona eyasungula iPhalamende leNtsha, yaqala amahhovisi entsha komasipala abehlukene KwaZulu-Natal.
Ekhuluma neLANGA emuva kokugixabezwa ngalesi sikhundla, uMnu Ntombela uthe uzizwa ethobekile ngokwethenjwa yiqembu lakhe ngaso.
Ukhale ngokuthi nakuba siqhamuka ngemuva komshophi wokudlula kukaMnu Mthembu, kodwa njengoba esejutshiwe, kumele asukumele phezulu athathe lapho eshiye khona.
Uveze ukubaluleka kwalesi sikhundla njengoba siyiphimbo lezinqumo ezithathwa yiqembu lakhe futhi nokudlulisela umyalezo oqondile emphakathini nakuzo zonke izinhlaka zeqembu.
“Okubalulekile wukuthi kube nokusebenzisana phakathi kwethu nabezindaba ukuze umyalezo nezinqumo zeqembu ziphume ngendlela eyiyo,” kusho uMnu Ntombela oveze ukuthi i-ANC ibhekene nezingqinamba okumele ilwe nazo kulesi sikhathi.
Uthi njengomuntu okhulele kwi-ANCYL, kuyamkhathaza ukungabikhona kohlaka oluqondile lwalolu phiko ngoba kusho ukuvaleleka kwezwi lentsha.
“Kuyiqiniso elingeke liphikwe ukuthi intsha iningi kuleli, ukungabikhona kohlaka olubhekelela izidingo zayo, kuyalilimaza iqembu, okuyinto esasikhathaza thina esikhulele kuyona,” echaza.
Kuyimanje i-ANCYL osekunesikhathi yagcina ukuba nomhlangano, iholwa yithimba lesikhashana njengoba ingqungquthela yalo yokukhetha ubuholi isibhuntshe izikhawu ezimbili.
Uphethe ngokubonga abaholi abake basiqhoqhobala isikhundla sokukhulumela i-ANC, okubalwa uMnu Dumisani Makhaye, uMnu Mdumiseni Ntuli osengunobhala we-ANC KwaZuluNatal kuya kuNkk Nomagugu Simelane-Zulu.
Kuyiqiniso elingeke liphikwe ukuthi intsha iningi kakhulu kuleli.