INYANGA INIKELELE ABANGAKUBO IGILOSA
ISUKUME yamela abelaphi bendabuko isiza ukuxosha ikati eziko emindenini ewu-50 yangakubo, inyanga yaseKorinte, eMzimkhulu, uMnu Bongani Gumede, inikelela ngokudla.
Umphakathi wakule ndawo udonsa kanzima njengoba iningi lemindeni enikelelwe iphila ngesibonelelo sikahulumeni.
Uthi bewulokhu uzwa ngapha nangapha kuthiwa abantu banikelelwe ukudla, wona ungazi ukuthi le nhanhla iyoze ifike kuwona.
UNkz Akhona Mzelumu (39), onezingane ezintathu, uthi ukunikelelwa ngalokhu kudla kuzowethula umthwalo osemahlombe akhe njengoba bephila ngesibonelelo sezingane ezimbili kwazise endala kayisaholi njengoba isineminyaka ewu-22.
“Sibonga kakhulu kuMnu Gumede ngokudla asiphe khona, sengathi kunganda nalapho ethathe khona," kusho uNkz Mzelemu.
UMnu Bukani Dlamini oziphilisa ngokudayisa izinsimbi ezindala, uthi ikati belilele eziko emndenini wakhe njengoba bese kungadayiseki kwazise izindawo abathengisa kuzona zivaliwe.
“Umuntu obesezama ngumama osebenza umsebenzi wasezindlini edolobheni eMzimkhulu. Lokhu kudla esikuthole la, kuzosigcina ibanga elide, kusilekelele njengoba sinezingane ezine esizondlayo,” kusho uMnu Dlamini.
UMnu Gumede uthi okumenze wanikela, wukubona usizi emphakathini awakhele, abantu bephelelwa nayimisebenzi.
“Le ndawo ngikhulele kuyona, bengihamba ngihlala emizini yabantu ngingakaze ngilale ngingadlile.
"Uma imisebenzi nakubona isibhimba, ngibone kufanele ngelula isandla ngoba nami ngilapha engikhona nje, kungenxa yabo beseka umsebenzi wami wokwelapha.
"Abantu basezindaweni ezikude ngabe kabazange bangazi ngisho ukungazi ukube abalapha ekhaya kabazange baweseke umsebenzi wami. Ngidume ngisho nakoGoli ngenxa yabo,” kusho uMnu Gumede.