Ulifeze kunzima elokuba ngudokotela
Umndeni wakhe uzame nokubambisa ngomuzi wakubo ukuze ayofunda e-England
AKAPHELANGA amandla ngokubhuntsha kohambo lwakhe lokuyofunda e-University of Cambridge, e-England ngo-2015 emuva kokuba umndeni wakhe uhluleke wukubambisa ngendlu yakubo enamakamelo amane ukuze athole u-R379 862 00 wokukhokhela ukufunda udokotela wokuqala omnyama ukuthola iPHD in Archaeology.
UDkt Bongumenzi Nxumalo (32), waKwaNongoma - kodwa owakhulela eMlazi - osehlonishwa umhlaba wonke ngokuba ngudokotela kwi-Archaeology - okuwumunxa wezemfundo obheka imvelaphi yenhlalo yabantu ngokucubungula izinsalela zezinto ababezisebenzisa phambilini, uthi umndeni wakhe wake wazama ukubambisa ngendlu yakubo ukuze ayofunda kule nyuvesi.
Ngenxa yokuthi imali yendlu yayingeneli ukufezekisa iphupho lakhe, kwaphoqeleka ukuba athi gozololo, kanti uzophinde aqokwe ngo-2016 ukuba ayofunda kule nyuvesi, esethole umfundaze kwiCambridge Africa Scholarship.
“Uhambo lwami lwempumelelo belunomzwangedwa kakhulu, ngalahlekelwa ngabangani. Ngiyawubonga umndeni wami oye wangeseka ezikhathini ezinzima,” kusho uDkt Nxumalo.
Uthi ukhulele emndenini okholelwa kakhulu emfundweni, uyisemkhulu ongasekho, uMnu George Nxumalo, wayekholelwa kakhulu ukuthi imfundo iyisisekelo sekusasa le-Afrika, kodwa ngenxa yobandlululo yena wangakwazi ukuyofunda ezikhungweni zemfundo ephakeme.
Uninakhulu, uNkk Thalazile
Nxumalo (104), uthi yisona sizinda ancela kusona ulwazi nobuhlakani obumsize kakhulu empumelelweni yakhe.
Uthando lokufundela i-Archaeology uthi lwamzuza ngesikhathi enza unyaka wokuqala kwiGeographic Information System (GIS) e-University of Witwatersrand.
“Ngathi uma ngifunda kabanzi nge-African Archaeology, ngazizwa ngifisa ukungena ngigxile kulo mkhakha ukuze ngiqonde kahle ngemvelaphi yabantu. Ngenza iHonours neMasters e-University of Pretoria.
"Ngo-2013, ngathola ithuba e-Uppsala University, eSweden elalingivumela ukufunda ngiqeqeshwe kwi-Archaeological Sciences. Ngo-2015, ngathola iHanisch Prize kwabeTransvaal Archaeological Society of Southern Africa.
"Ngo-2016 ngathola iminyezane kwiMasters in Archaeology, ngiyithweswa yi-University of Pretoria ngaphambi kokuba ngiyokwenza iPHD e-University of Cambridge,” kusho uDkt Nxumalo.
Uthi ucwaningo lwakhe belugxile kwiGeoarchaeology (okuyisifundo esimayelana nokucutshungulwa kwesakhiwo somhlaba, amatshe nemvelo yawo ukuthola imininingwane ngezinto ezenzeka kudala.
Abazali bakaDkt Nxumalo basaphila bobabili.
Babusiswa ngezingane eziwu-7, kubalwa naye udokotela.
Ubonge zonke izinzululwazi ebezimgqugquzela ukuba afundele lo mkhakha, okubalwa osolwazi base-University of Cambridge, e-University of Pretoria, e-University of Uppsala noxhaso lwemali aluthole ePalaeontological Scientific Trust, eSmuts Memorial Funding, e-Arch and Anth Fund eseMagdalene College nase-University of Cambridge.
Okunye ngoDkt Nxumalo * Uyazifela ngokuklwebha amapuleti. Isikhathi esiningi usichitha ngokuhlanganisa umculo we- house;
* Uyazifela ngeMamelodi Sundowns, iLiverpool yase-England, iWerder Bremen yaseGermany neFC Barcelona yaseSpain;
* Akashadelwe futhi akanabo abantwana; * Uthanda ukuphuza amahewu; * Usuke umbusisile uma umenzela amasi, inyama eyosiwe, ujeqe noma amadombolo ahamba nesitshulu. co.za
Uhambo lwempumelelo yami belunomzwangedwa, ngalahlekelwa ngabangani.