Ziwumqansa izethembiso zelakuleli kwi-IMF
Growth, Employment and Redistribution ( GEAR). Insika yalo kwaba wukunqindwa kwesabelomali.
Lokhu kwadala amazinyo abushelelezi kwabanye, ikakhulukazi iCosatu neSACP, okuyizinhlangano ezidla gqokweni lunye neANC, abakhala kakhulu ngokuthi i-ANC kayibanikanga ngisho ithuba lokuthi bakhwehlele ngalolu hlelo.
I-IMF imemezele ngoMsombuluko ebusuku ukuthi ibhodi layo livumile ukunika iNingizimu Afrika u-US$4.3 billion (okungaba wu-R70.7 billion). Uhulumeni uzoqala ukukhokha inzalo yale mali kulo nyaka, kanti isamba sona sizokhokhwa iziqephu ezintathu; esokuqala ngo-2023, esokugcina ngo-2025.
Le mali ibolekwe ngaphansi kohlelo lwe-IMF olungadingi ukuthi lesi sikhwama sibekele izwe imigomo ngayo. Izwe ngalinye elifuna ukuboleka ngaphansi kwalolu hlelo, liziphanyeka lona, lenze izethembiso kwi-IMF zokuthi lizozitakula kanjani obishini oludale ukuthi lidinge usizo. Ngokunjalo-ke, iNingizimu Afrika yenze izethembiso encwadini ebhalelwe umphathi we-IMF, yasayinwa nguNgqongqoshe wezeMali, uMnu Tito Mboweni, nomphathi weBhange loMbuso, lezwe, uMnu Lesetja Kganyago.
Kule ncwadi bathembisa ukuthi uma isivunguvungu seCovid19 sesithe damu, uhulumeni uzothatha izinyathelo zokwehlisa ukwenyuka kwenani lemali ebolekwayo.
Bathi enye indlela yokwenza lokhu, wukunquma ukuthi imali ebolekwa wuhulumeni ingadluli enanini elithile ( debt ceiling).
Okwesibili, uhulumeni uhlongoza ushintsho ngendlela ohlela ngayo isabelomali.
Lolu shintsho luzosho ukuthi zonke izinhlelo zikahulumeni ezihlomula kwisabelomali, kuzomele zichaze unyaka nonyaka ukuthi yingani zidinga inani elithile.
Okwamanje, uma uhlelo seluphasiswe wuhulumeni, luthola isabelomali, okuyinani elithasiselwa unyaka nonyaka.
Ngokohlelo oluhlongozwayo, zonke izinhlelo zikahulumeni zizoqala phansi unyaka nonyaka zichaze ukuthi zidinga malini ( zero-based budgeting). Ukuthi bezithole malini nyakenye, kuzonganakwa.
Lolu hlelo luzosetshenziswa kuhulumeni kazwelonke nabezifundazwe. Le ncwadi ithi le ndlela yokuhlela isabelomali izokwenza kube lula ukunciphisa igebe phakathi kwenani lemali okuhlelwa ukuthi isetshenziswe ngalowo nyaka neyentela uhulumeni olindele ukuyiqoqa.
Kuzokhumbuleka-ke ukuthi ukuze uhulumeni umelana nazo zonke izindleko zawo, uthasisela eyentela ngemali oyiboleka kubatshalimali.
Ezinye izinyathelo ngezokwehliswa kwezindleko zokuqashwa kwezisebenzi zikahulumeni noxhaso lwezinkampani zikahulumeni.
Lapho lolu xhaso ludingeka, uhulumeni uthi izinkampani ziyobekelwa imigomo enqala.
Uhulumeni wenza isibonelo ngoxhaso lwakamuva olunikwe i-Eskom. Uphinde wathembisa ukuthi zonke izabelomali ezibhekene nempi yeCoronavirus zizobhekwa ngeso lokhozi.
Umncwaningi-mabhuku kahulumeni uzophenya wonke amabhuku aphathelene nalesi sabelomali. Amagama ezinkampani ezithola izinkontileka ngaphansi kwalesi sabelo se-Covid-19, azokwaziswa umphakathi. Amagama abanikazi balezi zinkampani namanani ezinkontileka azokwaziswa nawo.
Unzima-ke nokho umqansa uhulumeni obhekene nawo ngalezi zethembiso.
Okukuqala, usabambane ngezihluthu nezinyunyana ezimele izisebenzi zawo kubangwa indaba yesivumelwano sokukhushulwa kwamaholo.
Ushintsho lwendlela yokuhlela isabelomali nalo kulindeleke ukuba lube nezingqinamba.
Eyokuqala ingaphakathi kuwona uhulumeni. Uhlelo lwe- zerobased budgeting seluke lwazanywa phambilini ngabanye ohulumeni, kodwa kwatholakala kunzima ukulusebenzisa.
Ukuncishiswa kwesabelomali nakho kuzodala amazinyo abushelelezi, ikhulukazi ezinyunyaneni nasezinhlanganweni ezikhulumela imiphakathi.
Nayo i-ANC iyodwa nje, ngeke ivumelane kahle nazo zonke izethembiso uhulumeni ozenze kwi-IMF.