SelukwiFifa elofanise abebhola nezinkawu
Kungase kuphele ngoLuc Eymael kwezokuqeqesha
KUNGASE kuphele ngaye ebholeni uLuc Eymael ongumqeqeshi waseBelgium osolwa ngokucwasa ngokwebala abalandeli bekilabhu abeyisebenzela.
IYoung Africans yaseTanzania ikhombe indlela u-Eymael obengumqeqeshi wayo ozakhele udumo elolonga amakilabhu akuleli.
Le kilabhu imxosha nje, yingoba lo mqeqeshi uzwakale enkulumweni eqoshiwe, ethi abalandeli bale kilabhu kabafundisekile, benjalo nje bayathanda ukubanga umsindo kuhle okwezinja nezinkawu.
Kuyona le nkulumo uze wacela ukuxoshwa ethi isimo sakuleliya lizwe kasimfanele. IYoung Africans kayibange isananaza yabe isimfaka amasondo. Le kilabhu kuvela ukuthi seyifake isimangalo enhlanganweni eyengamele ibhola emhlabeni, iFifa ngenhloso yokuthi lo mqeqeshi ajeziswe kanzima. Kuthiwa isimangalo sale kilabhu sesifikile ezandleni zeFifa iyasicubungula.
Umthombo waleli phephandaba uthe: “U-Eymael uyatatazela manje uyazisola ngale nkulumo ayenzile. Okubuhlungu wukuthi udaba selufinyelele kwiFifa, yiyona ezonquma. Naye useyazi ukuthi lolu daba selukwiFifa, uselindele ukubizwa. IFifa kayihambisani nhlobo nokucwaswa kwabantu noma ngabe ingayiphi indlela ebholeni.
“U-Eymael angase axoshwe unomphelo ebholeni kumbe ajeziswe iminyaka ewu-10 engazihlanganisi nebhola. Kodwa konke kuzocaca uma lolu daba seluhlalelwe ngoba lona selukwiFifa.”
U-Eymael ekhuluma naleli phephandaba ekwakhe eBelgium, uthe: “Ngiyazi ukuthi inkulumo engiyenzile idale umonakalo kubantu base-Afrika. Ngiyaxolisa.
Ngizwile ukuthi udaba sebeludlulisele kwiFifa kodwa-ke ngizoma ngichaze kabanzi ukuthi bengiqonde ukuthini, kayisiyo ngale ndlela abantu abayizwa ngayo.
"Kangibacwasi abantu ngokwebala, ungawahamba wonke amazwe engisebenze kuwona e-Afrika bangangifakazela. Kangikaze ngibe nobandlululo futhi kangisoze, ngibathanda kabi abantu abamnyama.”