ISITOBHA SOSUTHU SESIMAGANGE NGEYOKUSONGA I-PSL
SESIMAGANGE isitobha samaZulu FC ngebuya lemidlalo ye-Absa Premiership ezoqala ngomhla ka-11 kuNcwaba (August) emuva kokuhlaba ikhefu lezinyanga ezine kungadlalwa ngenxa yeCovid-19.
NgoMsombuluko u-Irvin “Iron Duke” Khoza onguSihlalo wePremier Soccer League (PSL) umemezele ukuthi iyabuya imidlalo yalesi sigaba. Kuzoqala ama- semi final eNedbank Cup ngoMgqibelo ozayo womhla ka-8 kuNcwaba. Owamanqamu walo mqhudelwano uzogijinywa uma sekusongwe imidlalo yeligi ngoMandulo (September).
USandile Khumalo ( osesithombeni) oyisitobha soSuthu, uqinise abalandeli bale kilabhu idolo ngokuthi sebekulungele ukuyolwela ibheji lale kilabhu kule midlalo.
Uthi okuhle ngayo wukuthi kayikho ikilabhu ezokube idlalela ekhaya okuzokwenza kungabi khona ovunwa ngokuthile njengoba bonke besekuhambeni.
USuthu kumiswe imidlalo yeligi luhlezi endaweni yesibili ukusuka emsileni we- log yalesi sigaba. Luvika izembe neBlack Leopards ebambe ibhuleki, iPolokwane City neBaroka FC.
“Ngicela ukuba abalandeli bethu bakhululeke, AmaZulu FC azokube esadlala kwiPremiership nangesizini ezayo. Ngiyasiqonda isimo esibi esikusona kwi- log kodwa kasiyi ehlathini.
Okungiqinisa idolo wumoya wobumbano ekilabhini. Okunye okungijabulisa kakhulu wukuthi akekho umuntu odlalela ekhaya.
“Sonke sihambile, lokhu kuzokwenza ukuba imidlalo ihlabahlose. Okunye okuhle wukuthi amanye amakilabhu avika izembe sisazodlala nawo, kumele sizibambele wona, siqinisekise ukuthi siyanqoba kuwona. Abalandeli bethu bangalilahli ithemba, baqhubeke baseseke nangokomoya,” kusho uKhumalo.
Izolo ngoLwesithathu kumenyezelwe izinkundla okuzodlalelwa kuzona imidlalo esele ye-Absa Premiership neyeGladAfrica Championship.
AmaZulu FC imidlalo yayo yasekhaya azoyidlalela eLucas Moripe Stadium, ePretoria. Yonke imidlalo esele yePSL izodlalelwa eGauteng ukuzama ukugwema ukusuleleka kwabadlali ngeCovid-19.
Funda kabanzi ngempilo yangasese kaSandile Khumalo engosini iNgaphandle kweNkundla ephuma njalo kwiLANGA