EyaseKZN engcupheni yokuchithwa yiPSL
ISIKHULU seRoyal Eagles uSbu Mpisane sigcizelela ukuthi nakanjani ikilabhu yaso izoyiqedela imidlalo yeGladAfrica Championship yize beyingajimi ndawonye selokhu iPremier Soccer League (PSL) yamemezela ukuthi amakilabhu asengaqala ukulungiselela ukuqhutshwa kwemidlalo yokusonga isizini ngaphansi kwemiyalelo eqinile yezempilo.
Kunovalo lokuthi i-Eagles izokhahlelelwa ngaphandle emakilabhini awu-32 azogonqa emahhotela ahlonziwe ukugcina abadlali bephephile kwiCovid-19.
Kula mahhotela kuzogonqa kuphela amakilabhu azophasa ukuhlolelwa leli gciwane kabili okuzokwenziwa ngokusezingeni eliphezulu.
UMpisane utshele ILANGA ukuthi wabatshela abadlali bakhe ukuthi mabaziqeqeshe ngabodwana kwazise kumba eqolo ukuhlolela leli gciwane.
“Bengingeke ngiqale ngokuhlolela abadlali iCovid-19 ngingazi ukuthi kuzodlalwa nini ngoba kumosha imali. Ngabatshela abadlali ukuthi kumele baziqeqeshe bodwa emakubo ukuze uma sesikahle isikhathi ngizobahlola ngaphambi kokuba sibhekise amabombo emidlalweni eGauteng.
"Ngihlele ukuhambisa abadlali abawu-25 ngoba sekusele imidlalo ewu-6 kuphela. Ngiyazi ngeke kube yinto elula. Uma singanqoba imidlalo emibili yokuqala kungacaca ngekusasa lethu kulesi sigaba,” kusho uMpisane.
Mayelana nekusasa likaMilton Dlamini ongumqeqeshi okwavela ukuthi uyashiya ngenxa yokungaholelwa, uMpisane uthe: “Umqeqeshi usekhona ekilabhini. NgoLwesine (namuhla) uzokube esekhona umqeqeshi wethu (uMilton Dlamini) bese siqala ukuhlola abadlali. Okubi wukuthi vele sekukhona abadlali abathathu asebehloliwe besemakubo bangitshela ukuthi banalesi sifo yize ngingeke ngikwazi ukuveza amagama abo.”
Odabeni lokushiya kukaMorgan Mammila obeyisikhulu esiphezulu kule kilabhu osejoyine iChippa United, uMpisane uthe kumele kwenziwe uphenyo ngoba lesi sikhulu kasikaze sesule ekilabhini yakhe.
Uphethe ngokuthi usexhumene nePSL ngezinhlelo zonke zekilabhu. Imizamo yokuthola uMammila, oseqalile vele ukusebenza kwiChippa iphunzile kwazise ucingo lwakhe belukhala lungabanjwa.
Ebuzwa uDlamini ngokubuya kwakhe kwi-Eagles, uthe ngeke aphawule lutho ngalolu daba, makukhulume uMpisane.