BAGQUGQUZELWE UKUBA BASIKE IPHETHINI KUMNU MLANGENI
UCHAZWE njengomunye wabaholi abebezinikela nabebeqotho kwiANC uMnu Andrew Mlangeni (95) enkonzweni yomngcwabo wakhe ebise-University of Johannesburg, eSoweto izolo ngoLwesithathu.
UMnu Mlangeni, oshone ngeledlule, besekunguyena yedwa obesadla anhlamvana kubaholi abagwetshwa ePalace of Justice, ePretoria ngo-1964, bayogqunywa eRobben Island emuva kwecala lodumo elaziwa ngeRivonia Trial.
Wagwetshwa nabanye abaholi okubalwa kubo uMnu Nelson Mandela, uMnu Ahmed Kathrada, uMnu Govan Mbeki, uMnu Arthur Goldreich, uMnu Walter Sisulu noMnu Denis Goldberg owashona ngoMbasa (April) nonyaka.
UMnu Mlangeni uhlonishwe ngomngcwabo osezingeni likahulumeni, ubuhanjelwe nanguMengameli Cyril Ramaphosa nabanye abaholi abehlukene okubalwa kubo uMnu Thabo Mbeki ochazwe njengomngani womndeni futhi oke waba ngumengameli wakuleli.
Ekhuluma kulo mngcwabo uMnu Ramaphosa, uthe uMnu Mlangeni ubengomunye wabaholi abebeqotho futhi ezithobile. Uthe ubengumuntu obehlale ekuzwakalisa ukukhathazeka kwakhe uma kukhona okungahambi kahle, ikakhulukazi kwi-ANC nakuhulumeni.
Uveze ukuthi ukudlula kwale ngqungqulu yomzabalazo kuvusa imibuzo ngabaholi abasekhona nalabo abaseza ngekusasa laleli qembu. Uchaze uMnu Mlangeni njengensika yeqembu ebihlale ilangazelele ukuba wusizo nokucobelela ngolwazi.
Unxuse amalungu e-ANC ukuba asike iphethini ebuholini bukaMnu Mlangeni osebenzele leli qembu ngokuzinikela nangokuzikhandla iminyaka engaphezulu kwewu-70. UMnu Mbeki uchaze umufi njengomuntu obesezingeni lakhe yedwa.
UMnu Mlangeni kuvele ukuthi ubekukhonzile ukudlala igalofu, okuwumdlalo aze wendela koyisemkhulu ezidlalela wona uma echitha isizungu. Ubekwe endlini yakhe yokugcina emathuneni aseRoodepoort, eGoli.
Ungcwatshwe ngesikhathi izwe lisabhekene nokubhebhetheka kweCoronavirus, kanti kushiye imibuzo kwabaningi kuphuma ibhokisi lakhe emzini wakhe oseSoweto njengoba imiyalelo kahulumeni ehambisana naleli gciwane ingalande-lwanga.