YEHLISIWE ESIHLALWENI INKOSI ILAHLWA NGAMACALA OKUNGAZIPHATHI KAHLE
IPHENDUKE umnumzane ingalindele inkosi yesizwe sakwaMavuso, oPhongolo yehliswa esikhundleni ngemuva kokulahlwa ngamacala okungaziphathi kahle emphakathini, okubalwa nokuzibiza ngesilo saseMpumalanga.
NgoLwesibili, uMnyango wezokuBusa ngokuBambisana nezoMdabu KwaZulu-Natal, ubuhlangene nozalo lwasendlunkulu yakulesi sizwe, amalungu omkhandlu wesizwe nengxenye yamalungu omphakathi, uyokwethula umbiko wokuthi uMnu Mboneni kaHambemeveni Mavuso akaseyona inkosi egunyazwe wumnyango emuva kokuba kwenziwe uphenyo maqondana nezinsolo ebezilo-khu zibikwa ngaye.
Ngokuthola kweLANGA, uMnu Mavuso bekungesakhe ngendlela efanele lesi sikhundla - abesesiphathe iminyaka ewu-16 - futhi kunguyena inkosana kaHambemeveni. Waqala ukusiphatha emuva kokuba waya emahhovisi omnyango eyocela ukuba kukhishwe esikhundleni umntwana uFuzeyekwabo Mavuso owaphakanyiswa wumndeni ukuba abambe isihlalo ngemuva kokukhothama kukayise.
Kubikwa ukuthi umnyango kawuzidalulanga izizathu eziningi ngaphandle kokutshela izethameli ukuthi inkosi ilahlwe ngamacala mayelana nezinsolo eziningi ebezibhekiswe kuyona. UMnu Msuseni Mavuso ongusihlalo wendlunkulu yesizwe sakwaMavuso, uthi ziningi izikhalo ebezilokhu zingena maqondana nokuziphatha kwenkosi.
Uthi nakuba umnyango ungakudalulanga okuningi phambi kwabantu, kodwa kuyaziwa ukuthi inkosi ivale intuthuko, kayifuni ukuzihlanganisa nendlunkulu kaZulu lapho okuphethwe khona wonke amakhosi aKwaZulu-Natal.
“Yindodana yethu le, kasinanxa nayo, inkinga yayo kayifuni ukuzihlanganisa nendlunkulu yeSilo. Ngicabanga ukuthi kwasona iSilo kayisazi ngisho nangeso, igcina ngokusibona kumabonakude. Udaba lonakala ngokuthi kufike umnyango owayinikeza incwadi eyigunyaza ukuba yinkosi.
“Yahlala nayo le ncwadi yangabe isafuna ukuyothela amanzi eSilweni njengokwesiko elenziwa yiwona wonke amakhosi. Ithi yona ingeyaseSwaziland futhi iyiSilo saseMpumalanga.
“Nesitembu sobukhosi yasishintsha sibiza uMkhondo, okuwuMasipala waseMpumalanga. Izolo (ngoLwesibili) akusimangalisanga ukufika komnyango ngoba vele besebevele bemumisile ekubeni yinkosi yesizwe. Nomphakathi ubika okwawo ngokungangeni kwentuthuko, okusolwa yena undodana wethu ngokuyivala,” kusho uMnu Mavuso. ILANGA lizame kaningi ukuxhumana nayo inkosi, kodwa kwangalunga ngoba ucingo lwayo belubanjwa kodwa kungakhulumi muntu.
UMnyango we-zokuBusa ngokuBambisana nezoMdabu KwaZulu-Natal, ukhiphe isitatimende osithumelele abezindaba mayelana nokwehliswa esikhundleni kwalo mholi. UMnu Senzo Mzila okhulumela lo mnyango, uthe banqume ukwehlisa inkosi ngemuva kokuba kwenziwe uphenyo kwatholakala ukuthi kayiziphethe kahle.
“UMnu Mika Mavuso uzoqhubeka nokuba yibambabukhosi kuze kube wukuthi umndeni uphakamisa elinye ilungu lawo elizothatha isihlalo,” kusho uMnu Mzila.
Okhulumela indlunkulu kaZulu, uMntwana Thulani Zulu, uthe belungakafiki ezandleni zendlunkulu udaba lokwehliswa esikhundleni kwenkosi yesizwe sakwaMavuso. Uthe lolu kusewudaba oluphakathi komnyango nesisebenzi sawo (inkosi).
ILANGA licele ukuba acacisele isizwe ukuthi ngubani onegunya lokuthatha isinqumo sokwehlisa inkosi esihlalweni uma ilahlwe ngamacala okungaziphathi kahle, wathi kuye kuncike ekutheni izinsolo ebhekene nazo zimayelana nani. Uthe indlunkulu inohlelo lwayo elusebenzisa ukusingatha izindaba ezithinta amakhosi.