KUYAPHOXA UKUHUDULA IZINYAWO KWE-ANC KWABENZA INKOHLAKALO
MHLELI: Nginike isikhadlana ngiphefumule ngenkohlakalo esifana nesiko ezweni lethu. Kuyihlazo ukuthi abenzi noma abamataniswa nayo kusuke kungabaholi noma izihlobo zabo.
Zolo lokhu, umengameli wethu (uMnu Cyril Ramaphosa) ubeshumayela ivangeli lokulwa nenkohlakalo okuyisona sihlava esibulala iNingizimu Afrika. Ayekusho sekufana nokuthela amanzi emhlane wedada.
Okungenza ngisho kanjena yingoba sekuhlonzwe umyeni womkhulumeli wakhe, uNkk Khusela Diko njengohlomulile kule Covid-19.
Nekhasayo iyabona ukuthi kukhona okushaya amanzi ngokunikwa kweNkosi yamaBhaca, uThandisizwe Diko - ongumyeni kaNkk Diko - ithenda yokusabalalisa izimpahla zokuzivikela kwiCoronavirus.
Okusenza sikhihle esikaNandi wukuthi ukube uNkk Diko ubengekho kulo mkhakha kahulumeni, umyeni wakhe ubengeke ayinuke le thenda.
Okusikhathazayo wukuthi izihlobo zabaholi ziyasebenzisana ukwenza inkohlakalo kuyo yonke imikhakha noma iminyango kahulumeni futhi ngeke ubabambe, kunalokho bajoyine, vele akekho oyaye aboshwe uma esebanjiwe, uvele ayiswe komunye umnyango.
Ngiyithanda impela i-ANC futhi kangiziboni ngivotela elinye iqembu ngoba liyovele lingene ulizwe lithi lisalungisa amademeshe enziwe yi-ANC, okuyoholela ekutheni nalo lidonse iminyaka eminingi lingasenzeli lutho. Okungiphoxa nge-ANC yilokhu kushodoza kwayo ilokhu icashisa abenzi benkohlakalo kweminye iminyango kahulumeni.
Ngiyafisa ukuba uMnu Ramaphosa enze okukodwa ngabasolwa, abakhombe indlela bese akha izwe lethu kabusha, kodwa-ke ngoba inkohlakalo sekwaba yisiko lenhlangano ebusayo, ngeke umbone ekwenza lokho.