Kunobulungiswa ukuqedelwa enkundleni kwemidlalo yePSL
ABATHANDI bakanobhutshuzwayo baseNingizimu Afrika sebemagange ngokubuya kwemidlalo yePremier Soccer League (PSL) ezovulwa ngoMgqibelo womhla ka-8 kuNcwaba (August) ngemidlalo emibili eyandulela owamanqamu weNedbank Cup. U-Irvin “Iron Duke” Khoza ongusihlalo wePSL, wenze isimemezelo esishiye abazifela ngonobhutshuzwayo beneme ngoMsombuluko eqinisekisa ukuthi isicoco se-Absa Premiership sizoqhubeka nokubangwa ensimini kusuka ngomhla ka-11 kuNcwaba.
Kuzokhumbuleka ukuthi sekuphele izinyanga ezine golokoqo imidlalo yePSL yamiswa emuva kokubheduka kweCovid-19 kuleli. Lesi yisikhathi eside kunazo zonke selokhu kwasungulwa iPSL ngo-1996, esesiphilwe ngabalandeli bebhola bebulawa yindlala yalo mdlalo olandelwa yizigidi zabantu kuleli. Nakuba imidlalo ibuya kodwa izogijinywa ezinkundleni ezingenabo abalandeli njengoba izwe lisagonqile ukugwema ukubhebhetheka mawala kweCoronavirus.
Yonke imidlalo izogijinyelwa eGauteng lapho wonke amakilabhu ezophoqeleka ukugoba amadlangala khona, ahlale emahhotela azokube evalelekile kuwona, abadlali nezikhulu bengakwazi ukuba wuvanzi. Lokhu kuzokwenziwa ukugwema ukuba batheleleke ngalolu bhubhane, kwazise ngeke avunyelwe ukuyogonqa kula mahhotela ahlonziwe ozotholakala ukuthi usesuleleke ngegciwane lalo mkhuhlane ekuhlolweni kwezinga eliphezulu okuzokwenziwa kabili ngaphambi kokuyovalelwa.
Nekilabhu ezohluleka ukulandela yonke imigomo yezempilo, ngeke ivunyelwe ukuyogonqa nokuba yingxenye yemidlalo. Ukuqedelwa kwemidlalo ensimini kuzokuba nobulungiswa cishe kuwona wonke amakilabhu njengoba kukhona abanga ukunqoba iligi nasempini yokuvika izembe. Ukuqhutshwa kwemidlalo kuzokwenza abazohluleka empini abakuyona bangakhali ngamuntu.
Isicoco se-Absa Premiership sibangwa ikakhulukazi yiKaizer Chiefs esesicongweni neMamelodi Sundowns elele isibili. Amakilabhu asengozini yezembe yiBlack Leopards, AmaZulu FC, iPolokwane City neBaroka FC. KwiGladAfrica Championship ushikishi lombango wesicoco luphakathi kwe-Ajax Cape Town eqhwakele, iSwallows FC, uThongathi FC neTshakhuma Tsha Madzivhandila (TTM).
Amakilabhu abhekene nezembe yiRoyal Eagles, iJomo Cosmos, iMbombela United neTS Sporting. Okubi kubathandi balo mdlalo baKwaZulu-Natal wukuthi kunamakilabhu amabili akulesi sifundazwe asengozini yezembe njengoba esigabeni esikhulu uSuthu lusenkingeni kanti kwiGladAfrica kubukeka iwa libheke umoya kwi-Eagles.
UKhoza uthe imidlalo izosongwa ngowamanqamu weNedbank Cup okulindeleke ukuba ugijinywe ngempelasonto yesibili kaMandulo (September). Emuva kwawo kuzoqala imidlalo yokuhlungela ukunyukela kwiPremiership ezogijinywa yikilabhu ezoqeda ingunombolo 15 esigabeni esikhulu namabili azosonga ekweyesibili nakweyesithathu ngokwahlukana kwiGladAfrica.
Ukubuyiswa kwemidlalo emuva kokumiswa ngenxa yeCovid-19, kakuyona into eqalayo ngePSL kwazise namaligi amakhulu ase-Europe asanda kusongwa ensimini emuva kokumiswa. Kula maligi kubalwa eyase-England enqotshwe yiLiverpool, eyaseSpain lapho ubhedu ludliwe khona yiReal Madrid neyase-Italy ekhale yemuka neJuventus.