SEBELAHLE ITHEMBA NGOKUFIHLA ITHAMBO LABO
USUKHANYISE amakhandlela waze wawacisha umndeni wakwaSimelane eMazizini, eBergville, ulinde ukufihla ithambo lendodana yawo eyasha yangqongqa engozini yemoto mhla ka-21 kuNdasa (March) nonyaka njengoba uthi namanje usalindele imiphumela yokuhlolwa kolibofuzo.
Unina kamufi, uNkz Sister Simelane (42), uthi akasazi ukuthi enzenjani, ayeke ukuzila noma aqhubeke.
Ekhuluma neLANGA, uthi indodana yakhe, uMnu Buyani Simelane (21), yayihamba noninalume besuka eMnambithi belibangise eBergville ngesikhathi behlelwa yingozi.
“Imoto ababekuyona yashayisana nenye eyayizama ukudlula. Uninalume wakwazi ukugaqa aphume emotweni yize wayenqamuke imilenze. Indodana yami nomunye wesilisa ongaziwa, basha bangqongqa ngenxa yokuthi babengakwazi ukuphuma,” kusho uNkz Simelane.
Uthi ucabanga ukuthi ukuvalwa kwezwe okwamenyezelwa nguMengameli Cyril Ramaphosa mhla ka-26 kuNdasa, kwaba nomthelela ekutheni kuthathe isikhathi ukubuya kwemiphumela yolibofuzo.
“Isidumbu sendodana yami sesinezinyanga eziwu-5 sisemakhazeni, okusho ukuthi lapha ekhaya kasikwazi ngisho ukubulala inkukhu. Sesihlale emakhandleleni saze sayeka ngoba kasazi ukuthi sisahlalele into ebukwa ngubani manje.
“Kwamina nginenkinga yokungakwazi ukubuyela emsebenzini, ngizobuyela kanjani kufanele ngabe ngizilile?.” kusho yena.
Uthi ngendlela lesi simo esibaphazamisa ngayo bewumndeni, kuke kuthi noma kukhona ilungu elijabulela okuthile, libuye lethuke ubala ngoba selikhumbula ukuthi kambe kakumele libange umsindo ngoba phela kushoniwe.
“Siyaqonda ukuthi ukwenziwa kolibofuzo kuyaye kuthathe isikhathi njengoba kuthiwa izicubu ziyiswa ePretoria, kodwa siyakholwa wukuthi sesiside kakhulu nesikhathi esesilindiswe sona.
“Okusixaka kakhulu manje wukuthi ngisho sixhumana nomseshi, uvele angasitsheli into eya phambili, kwesinye isikhathi athi isiteshi samaphoyisa sivaliwe,” kusho yena.
Uthi sebeke bacela nokuthi bazenzele ngasese ulibofuzo lolo, kodwa banqatshelwa.
“Bese sizimisele njengomndeni ukuthi okungenani sikhokhele inkampani ezimele isenzele ulibofuzo ngoba sesiside kakhulu isikhathi, kumele naye alale aphumule,” kusho uNkz Simelane.
Okhulumela amaphoyisa KwaZulu-Natal, uCapt Nqobile Gwala, uthe amaphoyisa asematasa nophenyo kanti nemiphumela yolibofuzo kayikabuyi.
“Uphenyo lusaqhubeka, sicela umndeni ubekezele,” kusho yena.
Uninalume wakwazi ukugaqa aphume emotweni yize wayenqamuke imilenze...