KUPHAZAMISEKE UKUQOSHWA KWE-ALBHAMU KUSHONA UNINA KABAHUBHE
UFICWE wukufa ebalekela iCoronavirus kwaphazamiseka umsebenzi wendodana yakhe unina womculi kamaskandi odlule emhlabeni ngeledlule.
Kuphazamiseke ukuqoshwa kwe-albhamu kaSbusiso “Bahubhe” Mkhize, wodumo lwengoma ethi “Nginithwesa Ugodo” ngesikhathi kungena ucingo ngoMsombuluko odlule esestudiyo eThekwini etshelwa ukuthi makaphuthume ekhaya eJolivet, sibi isimo kunina, uNkk Lucia Mkhize, uMaHadebe (76).
Lo mculi uthi utshelwe ukuthi makayeke konke akwenzayo aphuthume ekhaya.
Uthi ufike isimo sibucayi, unina ephefumulela phezulu, kubonakala ukuthi iphika lisho ukumqeda.
“Ukugula kukamama akunginikanga ithuba lokwenza izaba, ngifike ebusuku ehefuzela ngathi kuye masiye esibhedlela, wanqaba ethi usaba iCovid-19 le exakile ezweni. Ngizamile ukumhambisa kubantu besintu khona ebusuku, kwabonakala ukuthi kuyazifanela.
“Ngisuke lapho ngaya komunye umtholampilo phakathi nabo ubusuku, waxhunywa amapayipi nakhona wangabonakala umehluko. Ekuseni ngoLwesibili, ngithe makageze bamgqokise ukuze ngimhambise esibhedlela, kwathi sekumele agibele emotweni wavele washona singakaphumi ngisho ekhaya,” kusho uBahubhe. Utshele ILANGA ukuthi unina ubedla amaphilisi ezifo zabantu abadala, kodwa ubengenayo inkinga yephika nokugula obekubeka impilo yakhe engcupheni. Uveze nokuthi ekuhlolweni kwesidumbu, odokotela bathe unina ubulawe yisifo samakhaza. “Kumele samukele ukuthi emhlabeni konke kunesikhathi sakho,” kusho uBahubhe. Ukhale kakhulu ngokuthi kwenzeka lesi simo nje, ubesezinhlelweni zokulobolela uyise njengoba washona engakwenzanga lokho. UMaHadebe ufihlwe ngoMgqibelo khona eJolivet. Kwenzeka lokhu nje, omunye umculi kamasikandi, uNgiga Ndlovu, ushonelwe nguyise uMnu Makhalibhodi Ndlovu waseNquthu kanti emasontweni amabili adlule kushone uninakhulu kaKhuzani “iNdlamlenze” Mpungose.
www.ilanganews.co.za
Ukugula kukamama akunginikanga ithuba lokwenza izaba...