Luseyinkinga olwe-Covid-19
NGESIKHATHI sokulotshwa kwale ngosi, bekulokoza inhlansi yethemba ngokuthi yikuphi esingakwenza ukuze izwe liqhubekele phambili nasemuva kwempi eliyilwayo nesitha esingabonakali esiyi-Coronavirus.
Nakhu okunye kwalezo zinto ebeziphithanisa amakhanda ezikhulwini ngokuxoveka kwezinhlelo zayo yonke imikhakha yempilo eyejwayelekile:
Ngokwemibiko epotshoziwe, wudaba lwekhalenda elisha lokuvula kwezikole njengamanje uhulumeni okubikwa ukuthi uhlongoza ukuthi kufundwe kuze kube wumhla ka-15 kuZibandlela (December) 2020 amabanga uGrade R kuya kuGrade 11;
Ukuhlolwa kukamatikuletsheni kuhlo-ngozwa ukuba kuphothulwe mhla ka-15 kuZibandlela (December) 2020;
Nokukhishwa kwemiphumela kamatikuletsheni ngoNhlolanja (February) 2021.
Kubikwa ukuthi lesi sichibiyelo kulindeleke ukuba uNgqongqoshe wezeMfundo eyiSisekelo, uNkk Angie Motshekga asimemezele ngomqulu kahulumeni (Government Gazette) ukuze kuphele ukudideka okukhona ngalolu daba.
Ngaphandle kodaba lwemfundo, olunye olusematheni wumzamo kaMengameli Cyril Ramaphosa lapho edwebe umugqa obomvu ngesinya-thelo sikahulumeni kulabo abathintekile kweyokudliwa udede kwemali yezimfanelo zokuzivikela ekuhaqweni yi-Coronavirus.
Kuleyo nkulumo ayethula mhla ka-24 kuNtulikazi (July), wathi usesayine incwadi egunyaza uphiko lwamaphoyisa iSpecial Investigation Unit, ukuba luphenye futhi kushushiswe bonke abathintekayo.
Okuqubule ukuhhomuzela ngalawo magama wukuthi khona ehhovisi likamengameli sekube nesidingo sokuba okhulumela yena qobo umengameli, uNkk Khusela Diko, amiswe emsebenzini ngenxa yokuthinteka kwakhe odabeni lwemali yezimfanelo zokuzivikela.
Kalisalanga igama likaNobhala-jikelele we-ANC, uMnu Ace Magashule, okubikwa ukuthi amadodana akhe amabili ayathinteka kuzo ezamathenda alezi zimfanelo, okusalindwe uphenyo i-ANC ethembise ukuthi luzokwenziwa ngaphambi kokuba iphawule ngokuzolandela.
ICORONAVIRUS NGEKE IDLULE MANJE
Ezibuhlungu zithi - kungafani namanye amagciwane aseke abikwa phambilini - eleCovid-19 elingenise ngamandla emhlabeni jikelele, iWorld Health Organisation (WHO), ixwayisile ngoMgqibelo odlule yathi ongoti bathi lesi sifo kungase kwenzeke sidonse isikhathi eside.
Ngaphezu kwalokho, okukhathazayo yingozi engase ibe khona yokuphelelwa wumdlandla komphakathi ngale ndaba ngenxa yesimo sengcindezi kwezomnotho nenhlalo yomphakathi emhlabeni jikelele.
Ephawula uMengameli Cyril Ramaphosa kuthangi, ugcizelele ukuthi izakhamizi zaseNingizimu Afrika ziqhubeke nokuhlala ziqwashile ngengozi yaleli gciwane kuze kube yilapho zehla khona izibalo zabathelelekayo ngoba nxa zingenzi kanjalo, inkulu ingozi yokuba libuye liqale phansi lidlondlobale igciwane.
Usho nokuthi indlela yokululama kwezwe kulo mkhuhlane izothatha isikhathi eside futhi izoba nzima.
INDLALA
Ezakamuva ngokuthinta impilo yabantu ngqo, yingozi yendlala njengamanje ecathamela isizwe, ngokusho kukangqongqoshe wezokuThuthukiswa koMphakathi, uNkz Lindiwe Zulu.
Echazela abezindaba ngoMsombuluko odlule, uthe izifundazwe ezihlonzwe njengalezo ebhoke kakhulu kuzona indlala yi-Eastern Cape, iWestern Cape, iNorthern Cape neMpumalanga.
ISIMO NGEZINOMBOLO ZOKUTHELELEKA
* Khonamanjalo izinombolo zakamuva ngokutheleleka ngegciwane kwabantu bakuleli, ziveza ukuthi sebevile engxenyeni yesigidi osekuqinisekisiwe ukuthi bahaqekile.
Khona izolo kubikwe ngokudlula emhlabeni kwabawu-148 ngenxa yawo belu lo mkhuhlane. Kulesi sibalo abawu-41 ngabaKwaZulu-Natal, kuze iGauteng ngabawu-40, kulandele iEastern Cape ngabawu-36, yi-Western Cape ngabawu-24 nabawu-7 baseNorthern Cape.
Sebebonke asebedlulile emhlabeni selokhu lifikile igciwane, bawu-8 153. Abahloliwe kuze kube yimanje bawu-3 001 985.
Abawu-503 290 kulesi sibalo sabahloliwe, kutholakale ukuthi bahaqekile kanti abelulamayo kubona bawu-342 461. Lokho kusho isilinganiso sika-68% sokululama.
Sebedlulile engxenyeni yesigidi abantu okuthiwa bahaqekile.