UGESI USUBIZA UKWEDLULA NGISHO INYAMA BO!
NGIBINGELELE bazalwane, yize nje ngibuya iziqephu njengoSgudi S’nayisi. Cha ningethuki, kangibuyile empeshenini, ngisenguyena nje u-Emeritus Rev Mkhekhelezi lo enimaziyo.
Kunengoma esasiyishaya embholohweni ngabo-1992 ngakithi KwaDlangezwa, eMpangeni, siholwa nguJustice “Msindazwe” Mdletshe, ethi: “Ubokheth’ ukuthula Dudu - o-khethukuthula s’thandwa sami - oh mina - ngihamba noDudu - oh mina ngihamba nesithandwa sami...”, kunenye-ke esasiyicula kuSunday School eQambokwethu Primary School, sifundiswa nguthisha uMadela, eyayithi “Akusavumi mangithule...” Cha bazalwane, ngithi iyawina le ekathisha uMadela, akusavumi mangithule.
Yize ngiyisiqashi eThekwini kwazise umasipala wami wuMhlathuze le ngaphansi kweKing Cetshwayo Municipality, kodwa kangikwazi ukuthula ngibuke emqashweni konakala.
Mastende wami, baba Mxolisi Thomas “Kholwangokubona” Kaunda - ningangibuzi-ke ukuthi umastende wami uhlobene yini nomnewethu lo owaba ngumengameli wokuqala waseZambia, uKenneth Kaunda, angizelanga izindaba zikamastende la eThekwini - ngithi mangisho nje, hhayi ngoba ngikhononda, baningi abantu abasebenzisa izidingo kodwa bengazikhokheli, kunalabo abazikhokhelayo lapha eThekwini.
Kukhona le mizi evele iqhibuke eduze kwamalokishi sengathi ngamakhowe anophoyizeni abe nebhadi uxamu wageja umgodi, aqhibuka kanti kuduma izulu lomthakathi. Uyabona mastende, uma ngabe ungaya kule mizi ubheke ukuthi ukhona yini okhokhela ugesi namanzi, ngiyakutshela, ungabona isimanga ikati libhukuda lingaphoqiwe yisimo uma ungafica kukhona abakhokhayo.
Mastende, kangisho ukuthi abantu mabanganikwa ugesi, kodwa phela yisemhlabeni la, lo gesi kawuyona i- manna eyehlela abantwana bakwa-Israel eBhayibhelini, uyakhokhelwa, abantu mabawukhokhele ugesi.
Nayo igenge yakho mastende, uma sibika ukuvuza kwamanzi, yizitamukoko nokuhamba kukagesi, mayingaqali ishone le eDududu ize ifike ngakusasa KwaMashu la kunenkinga khona.
Kwayona njalo le mizi engikhuluma ngayo mastende, ivele igxunyekwe nje phansi kwenkunzimalanga yedwala okuyothi mhla iwa, kufe ngisho nentuthwane yakhona.
Uma uthi uyabuza amagama alezi zindawo, o-Addis Ababa, Ethiopia, Uganda no-UTP.
Sibuze-ke thina ngezwi lalo popayi okuthiwa nguNoko Mashaba: “What does UTP stands for?”
Aphendule umfana ohlala kule mizi: “Hhayi wena malum’ ankela, le shandisi isho ukuthi United Tribes of Pathway...”
Kuthi kusahlwe emini, aqhubeke umfana achaze ukuthi lapha kukhona uGumede umZulu wangakithi eMpangeni ozifelayo ngokuchatha, utat’ Sbongile Mvakwendlu waKuqumbu, e-Eastern Cape ozenza into eyazi isiNgisi, uKgaogelo Motlakoane waseLesotho onomhlambi wezimbuzi nezimvu khona la e- skom- lokishi kodwa osebizwa ngoNomusa, uFernando Marcos iShangane lakomalume le eMozambique owakha obhavu bakathayela - kodwa osebizwa Sthembiso “Sthenyane” Mkhwanazi, uzwe olimini ukuthi cha sengathi nguShamase oyiShangane lo.
Kunenkunzi kamakhenikha, uFubumba Ringura waseMalawi, okuthi uma ekhuluma nomakhalekhukhwini ungazi noma ukhuluma isiChichewa, isiNyanja, isiSwahili noma yisiKiguyi ngoba indlela ashesha ngayo, ungathi i- voicebox yakhe ine- turbo.
Bonke-ke laba bantu mastende, ngisho nabafika eMany Cannibals Africa bevakashile, bagcina sebefana nolamthuthu owaba nenhlanhla kwafa umuntu owayeyogeza ngawo ibhadi ungakahlatshwa, wagcina usufuyiwe njengezinkukhu zonke, badla ugesi wamahhala.
Iqiniso nje mastende - uyeke ukuthi nina bosopolitiki nithanda ukuba bahle kubo bonke abantu ngisho noma abantu sebephambuka endleleni ngoba nincenge amavoti - kayidumi kanje uma izosuka.
Abanye balaba bantu banamabhizinisi bashisela izimoto, bapheka amagwinya banamasaluni kodwa badla ugesi wamahhala.
Uyabona mastende, le nto kayidingi ngisho i- logic ngoba ne- lowgic ingasebenza; uma wena namacomrade akho uSboniso Duma, uMsihlez Zikalala, Kwazi Mshengu mhlawumbe-ke nomalum’ Mike Mabuyakhulu nihlela i- party kabring and share, bese-ke uMsihlez, u- uncle Mike nomfo kaDuma baqome ukungaphathi lutho, badle ngandoda, wena noMshengu nizoqhuma.
Hhayi ngeke ngithule mastende, usufica izintambo zikagesi kuyimibalabala zinqamula phezu komgwaqo sengathi yizintambo zamateki eRasta esezalala uthuli lweminyaka, kudliwa ugesi mahhala.
Mastende, mhlawumbe wena ugesi kawuwazi ukuthi ubiza malini esitolo - i- price yawo uyizwa ngendaba njengezitaringi zaseBhayibhelini oMose no-Isaiah - ake sikutshele-ke thina, ubiza udlula inyama.
Kuba sengathi inhliziyo yami ihudulwa emgwaqweni oyi- gravel uma kade ngiyothenga ugesi bese ngibona lezi zintambo ezimibalabala ezithwele ugesi wokwebiwa. Mastende, ake wenze kanye nje, just once - ngingasasho ingoma kaJames Ingram osewazilalela kobandayo - ake ulungise indaba yokukhokhelwa kwezidingo, kodwa uyishebe nale yokuthi uma sikhononda ngogesi ohamba njalo namanzi ahamba njalo, izisebenzi zakho zingalokhu zicabanga ukuthi zizotelekelani-ke manje ukuze inyunyana yazo ihlale isematheni, kodwa ziphuthume.
Le nto nje ingalunga, ngeke ubone kwasiteleka, bopha amasela angama- comrade adla imali yokwenza izidingo, lungisa ingqalasizinda, abantu mabakhokhele izidingo - ongafuni aphindele kwelakubo ngoba iningi labantu abashisa izakhiwo nemigwaqo nabangazikhokheli izidingo akubona abaseThekwini.
Lapho-ke kubalwa nami, phela mina ngatshelwa komalume ukuthi umentshisi akuyona into yokudlala - futhi ihlale inakekelwa ingqalasizinda, uyophatha idolobha eliphumelelayo.
Kukuwena-ke mastende ukuthi uyabayeka nje o-UTP bazigalavantele, kube yikwamachanca... awuthi ngisho ngesiNgisi ngoba yisona mastende enisizwa kalula lapho kwapolitiki... kube yikwa- do as you like, a desrespectful duiker.
Sekuyoba yiwona-ke umona abantu bethi ngitolika imfeketho, cha kusegazini ubaba ongizalayo umSiphoz, wayengutolika buzani iNkosi Man go Sooth Boothless.
Hikhensile ngopfu ma-Afrika!