Sekuyenzeka esasixwayiswe ngakho ngababandlululi
EMINYAKENI edlule abampisholo baseNingizimu Afrika babezishaya izifuba, bethi leli zwe ngeke lifane namanye amazwe ase-Afrika lapho ukwebiwa kwemali yomphakathi nenkohlakalo ezinhlakeni zikahulumeni sekufana nesikompilo. Babekusho lokhu nxashane uhulumeni wobandlululo wabamhlophe uthi ngeke bakwazi ukuphatha izwe uma benganikwa amandla okwenza lokho, yingakho kungafanele bathole ivoti lokuzikhethela uhulumeni wentando yeningi.
Izikhulu zikahulumeni wobandlululo nabamhlophe ababehambisana nokucindezelwa kwabampisholo ngokobuhlanga, babekhomba amazwe amaningi kuleli zwekazi ayebuswa ngabampisholo, ayegutshuzelwe yifu lenkohlakalo nokuhluleka kohulumeni bawo ukuphatha izwe ngendlela, bathi neNingizimu Afrika iyofana nawo mhlazane abamnyama bathola inkululeko.
Kuyajabhisa ukuthi okwakuxwayiswa ngontamolukhuni sesikubona ngamehlo namhlanje, lapho izinhlaka eziningi zikahulumeni zehluleka ukwenza imisebenzi yazo. Omasipala bayehluleka wukuhlinzeka izidingo zomphakathi, izikhulu zawo zizitika ngemali yomphakathi. Iminyango kahulumeni ezifundazweni nakuzwelonke iyehluleka wukuhlinzeka imiphakathi ngezidingo, igutshuzelwe wubusela nenkohlakalo eyesabekayo.
Ukwebiwa kwemali yizikhulu zikahulumeni kwafika eqophelweni eliphezulu ngesikhathi kusaphethe uMnu Jacob Zuma engumengameli, lapho umndeni owawungabangani bakhe wakwaGupta odabuka e-India, waxebula izigidi ngezigidi ezinhlakeni zikahulumeni ezehlakalweni zenkohlakalo.
Amasela ayesephelelwe ngamahloni nonembeza njengoba kwathi nxashana kudlula emhlabeni owayengumengameli wezwe, uMnu Nelson Mandela ngoZibandlela (December) ka-2013, aqhamuka namatulo okuntshontsha nemali okwakuthiwa ihlinzekelwe abantu ukuba baye emngcwabeni wakhe.
Kwathi uma kungena uMengameli Cyril Ramaphosa emuva kukaMsholozi ngo-2018, yena neqembu elibusayo i-ANC batshela izwe ukuthi izinyo selizogaya ngomunye umhlathi manje, kuzophela ukuzichanasela nje emaseleni. Sekucacile ukuthi babehulula imfibinga (behhema nje).
Ukugadla kweCovid-19 nokwabiwa kwezigidi zemali wuhulumeni ukulwa nalesi sifo, sekumbule uhulumeni kaKhongolose izinqe futhi njengoba sekuvele ukuthi izikhulu zawo nabangani bazo abaphila ngamathenda babelane amathenda anonile okuthenga izinsiza zokulwa nesifo ngendlela enenkohlakalo.
Inkohlakalo isininde ngisho ihhovisi likamengameli wezwe imbala njengoba umkhulumeli wakhe, uNkk Khusela Diko, ephoqeke ukushenxa esikhundleni emuva kokuvela kobufakazi bokuthi umyeni wakhe, uMnu Thandisizwe Diko wahlomula emathendeni ayabiwe wuhulumeni waseGauteng okuhlinzeka izinsiza zokulwa nalesi sifo.
Izinsolo zenkohlakalo sezilahlekisele ngomsebenzi noNgqongqoshe wezeMpilo eGauteng, uDkt Bandile Masuku, osemisiwe emsebenzini ngesikhathi kusaphenywa ngokwabiwa ngenkohlakalo kwamathenda wumnyango wakhe. Cishe zonke izinsuku kuvela amahlazo okwebiwa kwemali yethu ngamasela angenamahloni futhi asephelelwe ngonembeza.
Okujabhisayo wukuthi okwaxwayiswa ngababandlululi bethu phambilini sekuyenzeka, kwenziwa ngabantu bakithi esabavotela ukuba basisebenzele, ukuze siphile impilo engcono.
Lafa elihle kakhulu!