Sengathi bangabuyisa ubuntu sebengaphesheya kwethuna
OKOKUQALA nje, mangibe ngumuntu ngithi emndenini wakwaMlangeni, uMnu Andrew Mlangeni akafile, akahambile, kodwa ugodukile, ngakho makalale ngoxolo, umphefumulo wakhe ufice asebahamba phambili ayelwela nabo inkululeko sebemlindile, bamemukele.
UMnu Mlangeni ubese esele yedwa kubalweli bomzabalazo abagwetshwa ePalace of Justice ngo-1964, ecaleni lodumo elaziwa ngeRevonia Trial.
Kwabanye abagwetshwa kubalwa uMnu Nelson Mandela, uMnu Walter Sisulu, uMnu Oliver Reginald Tambo, uMnu Ahmed Kathrada, uMnu Denis Goldberg noMnu Govan Mbeki.
UMnu Mlangeni uhamba nje, ulandela uMnu Goldberg owadlula mhla ka-29 kuMbasa (April) kulo nyaka kanti yena walandela uMnu Kathrada owadlula mhla ka-28 kuNdasa (March) 2017.
UMnu Kathrada wayelandela uMnu Mandela owasishiya mhla ka-5 kuZibandlela (December) 2013. Elami lithi bonke kabafanga kodwa bagoduka njengalokhu kuyaye kushiwo kumuntu osuke ehambe esemdala nemisebenzi yakhe eseyenzile.
Singakhala, sikhalisane kufanele ngoba ukufa akujwayeleki. Uma umuntu-ke egodukile, likhulu ithemba lokuthi lapho eya khona uzofika koyisemkhulu abike akushiye ngemuva ukuze izinkinga azishiyile kulekelelwe ukuthi zigcine zinqotshiwe.
Inkinga enkulu-ke yilena yokuthi njengalokhu sekuhambe isosha lokugcina elama kwiRevonia Trial, ngabe ababekulwela sisakumele na? Ngabe mhlawumbe ababekulwela yikhona yini lokhu esesikubona namhlanje?
Okokuqala engithanda ukukuphawula, umsindo owenzeka lapho uMnu Jacob Zuma - naye owayenabo emzabalazweni esethi uyaphawula ufuna ukuba yingxenye yokuvalelisa.
Ngokwesintu umsindo yinto eyayingavumelekile lapho kuhambe umuntu ekhaya, ngisho emphakathini, kangisayiphathi-ke kubantu abalwela into enkulu kangaka esiyibiza “ngenkululeko”.
Yebo umndeni unalo ilungelo lokuthi wenze okuthandayo ngomuntu wawo osuke esedlulile emhlabeni - ukuvumela ukuthi ngubani ongeza nobani ongamdingi - kodwa uma sekuba wumsindo wesizwe sonke, lokho kuthanda ukuthi kuthinte amathongo angamele lelo lizwe.
Umbuzo uthi ave yini ozakwabo engiqale ngokubabala ngasenhla bethintekile yilo msindo; okwesibili, uze usuka nje ubangwe yini, lapho sekuhamba iqhawe lokugcina ngci.
Okubuhlungu wukuthi zolo lokhu, uMnu Zuma besimthanda, samkhetha waba ngumengameli, kodwa manje sesithatha sengathi usengesikhulu isitha lesi, ngisho inkantolo ingakaqedi ngamacala abekwe wona.
Okubuhlungu siyothini sesibange wonke lo msindo ngaye simusho lokhu nalokhu, ekugcineni aphume phambili kuwona wonke la macala?
Okunye okungithinta ngokuhamba kukaMnu uMlangeni, bengisathi mhlawumbe sekuyokuba nguyena oyomela asebehambile ekuthelelaneni amanzi neNkosi
Mangosuthu Buthelezi, njengalokhu seyicele kaninginingi ukuba kuthelelwane amanzi phakathi kwayo, yiqembu layo i-IFP ne-ANC.
Ukwenza kweNkosi Buthelezi kutshengisa isintu somuntu omnyama ukuthi uma nike nangabona ngasolinye, kufanele ekugcineni imindeni yomibili ithelelane amanzi ukuze kungabi wumkhokha kumbe amashwa emindenini eyathuka ixabana.
Usehambile-ke uMnu uMlangeni kungasenzekanga lokho. Lo msindo osukile, usuke ngesikhathi esibi izwe ligaseleka lijijimezeka yiCovid-19, namhlanje sibalwa namazwe awu-5 anesibalo esiphezulu sabantu abanalesi sifo.
Kwakhishwa u-R500 billion wokubhekana nalesi sifo, kodwa wabhubhudlwa.
Kuvuka amacala kubantu abangaphakathi emahhovisi kamengameli uqobo lwakhe, khona lapho i-International Monetary Fund (IMF), isikhiphe u-R70 billion iboleka iNingizimu Afrika, zibekwa nje baningi asebezibuza ukuthi kazi nayo le mali ngeke yini igijime ngomhosha njengamanzi.
Izingovolo sezivulekile, kukhona asebebala izimoto nemizi abazoyithenga ingakangeni ngisho ebhange.
Kuningi kuyasivelela, kuwa izinkampani zikahulumeni, simemezana sodwa ngomsindo, sinqumela abantu ukuthi bonile izinkantolo zingakaqedi, ukuthelelana amanzi siyakubalekela, iCovid-19 iyagadla kayidlali.
Izwe libheke ezansi, kufa abesifazane ngezandla zamadoda, kwahamba isanusi esikhulu uBaba uCredo Muthwa ngesikhathi seCovid-19, kanti kwenzekani?
Engingakusho nje wukuthi izwe seliphelile uma singaboni.
Kuyisicelo sami njengalokhu amaqhawe eRivonia Trial esephelele ngaphesheya kwengcwaba, ukuba abuye azolungisa lapho konakala khona, njengalokhu eshiyile. Lihle iqiniso lukhulu luyeza luyanyelela, uyongibuza ungiphale ulimi.
Bhedlindaba “VVO” Mkhize ungumsunguli wesikhungo esibizwa ngokuthi Umsamo Institute.