IZINGWAZI ZAKITHI
UKUYIPHETHA indaba yethu ngengwazi kanobhutshuzwayo uVuma Mfeka, sizokhumbula ukuthi ngokudlule sigcine lapho echaza khona ukuthi nxa kukhulunywa ngowomkhaya esifundazweni iKwaZulu-Natal, kwakusuke kushiwo umdlalo ophakathi kweZulu Royals United ne-African Wanderers.
Wabala nezingwazi zangezinsuku zakudala ezadlala unobhutshuzwayo, ikakhulukazi lezo ezazidlala indawo yakhe kanozinti, phakathi kwazo okukhona uPatson “Sparks” Banda, uFrederick “The Cat” Mfeka noCyprian “Mahhala” Maimane.
Uthi yena nezingwazi kubalwa uPetros “Ten Ten” Nzimande osadlula emhlabeni, uMcDonald “Rhee” Skhosana noStanley “Screamer” Tshabalala osebenza kwi-Orlando Pirates, bake baqokwa ukuba babe ngabadlali abayizivakashi ekilabhini yaseSwazini iMakhosini Chiefs eyayinomdlalo onzima neKabwe Warriors yaseZambia. Lo mdlalo waphela zibambene ngo-2-2.
UMfeka uthi akasoze akulibala ukusizwa nguLinton “Cutter” Nkosi ayedlala naye, owayefunda eSt Chad's engukaputeni, yena esafunda eSt Augustine egijima esiswini ngakwesobunxele.
Uthi unesifiso esikhulu empilweni yakhe sokubonga uPius “Chippa” Mthanti ngokuzinikela kwakhe ekumthatheni ngemoto yesikhulu ngemuva komdlalo ambuyisele esikoleni oNgoye ekubeni kungewona umsebenzi wakhe.
Wayenza lokhu ngenxa yothando kuphela. Uthi uMthanti nguyena owamfundisa ukushayela imoto nakuba kuyimanje uyashayela.
Namuhla siqhubeka nale ndaba lapho eseqalile ukusebenza umsebenzi awufundele enyuvesi wobuthishela phela. Sizophawula ngekhono lakhe lokuvumbulula amakhono kubadlali abasebancane, umbono wakhe ngekusasa lebhola lezinyawo kuleli, nokuthi wenzani manje.
Engakayeki ukudlala unobhutshuzwayo uVuma uqale umsebenzi wobuthishela eMakhumbuza Secondary, wabuye waya KwaMakhutha High. Lapha ezikoleni abefundisa kuzo nguye obephatha ezemidlalo, ikakhulukazi unobhutshuzwayo. Baningi abadlali abebefunda abadlule esandleni sakhe, abanye kubona bagcine sebedlala esigabeni esikhokhelayo, njengoMoses Ngcobo obefunda KwaMakhutha High owagcina esedlala kwiKaizer Chiefs; noLesley Kheswa owagcina esevimbela AmaZulu.
Kuthe esenguthishanhloko KwaMgaga High lapho uthisha owayephethe ezemidlalo kwakunguBen Dladla, manje osephethe ikhilikithi KwaZulu-Natal, kubadlali abadlule ezandleni zabo ubala uDumisani Mtshali-Ngcobo weAfrican Wanderers, uTim Nzoyi weMoroka Swallows, iLeeds United yaseWentworth namaZulu FC, uLesley “Sguqa” Langa owaduma kwiKaizer Chiefs neReservoir Hills United ka-AK Jeewa eyayigijima kwiFirst Division, uTimothy “Sbhamu” Khomo owayengunozinti owagcina kubaQulusi, uProtas “Scara” Ndlovu owayegijima kwiDurban United neDurban Bush Bucks ngesikhathi isaphethwe nguPhilemon Cebisa wase
Harding osadlula emhlabeni. UCebisa wayewaphethe ngobunyoninco AmaThol’ Amnyama ngama-90’s, uBonga Shusha waseLamontville, uGiven Khumalo owayelihlikihla kwiLeeds United ka-Errol Hughes izinze eWentworth, uFerreira Ndlovu osenguthisa noSenzo Meyiwa we-Orlando Pirates neBafana Bafana osadlula emhlabeni, uS’fundo Gumede owayengalibheki ipali kuMlazi Citizens.
Ngesikhathi ephethe KwaMgaga High, lesi sikole sabalwa phakathi kweziwu-20 eNingizimu Afrika ezazibizwa ngeDinaledi Schools kwazise zazenza kahle kwiMaths neScience zibe zinabafundi abaningi.
Lokhu kwaholela ekutheni bonke othishanhloko balezo zikole banikwe imifundaze yokwenza iMasters kwiSchool Leadership and Management e-University of South Carolina, e-USA. Lokhu kwathatha iminyaka emibili.
Ngo-2006 uVuma uqashwe ehhovisi likaNdunankulu ngesikhathi sikaSibusiso Ndebele kwaze kwaba ngu-2009. Ngaye u-2009 uqashwe yiFifa waba kwi-Organizing Committee yeFifa 2010 World Cup okwaqhubeka kwaze kwaqedwa umqhudelwano.
Njengamanje uVuma usembhidlangweni wokuloba incwadi ekhuluma ngomdlalo webhola lezinyawo, esihloko sithi “Izingwazi Zayizolo Nangomuso” - Unforgettable Legends. Kanti futhi unenkampani yonogada njengamanje esebenza eMoses Mabhida ebizwa ngeVumani Security.
Umsakazi woKhozi FM uPhillip “Babayi” Zwane owayenekhono lokuqamba abadlali, wametha izibongo ezithi “Siyavuma” kanti ngezinsuku esadlalela uMlazi Citizens wayebongelwa kuthiwe ngu"Spider”. Abanye abadlali abaqambayo nguCecil Chiliza yena owametha ngokuthi nguGolden Boy noThemba “Tizzah” Twala yena owametha wathi ngu "Mercy Mercy”. Mayelana nemizamo yokuthuthukisa ibhola, ikakhulukazi kulesi sifundazwe, uthi iziphathimandla bekungaba kuhle ukuba zibasebenzise abadlali abadala abadlala phesheya, njengoSibusiso “Rhee” Zuma, uSiyabonga “Bhele” Momvethe osegijima kuThongathi FC, noMacBeth Sibaya oke wayibamba esikhungweni seSuperSport United.
Uthi laba bangasiza ekuthini bangenise abafana abancane bakuleli ezinkulisa zamakilabhu aphesheya ngoba bazakhela igama kulawo mazwe. Futhi uthi abantu abanjengoGugu Marawa njengamanje okwiKZN Academy kumele bakuthole ukwesekwa yiziphathimandla zeTheku nezesifundazwe ngemizamo yabo asebeyiqalile ngale KZN Academy. Okunye ngomlando kanobhutshuzwayo uthi abafundi sebeyokuthola encwadini asembhidlangweni wokuyibhala njengamanje futhi okunethemba lokuthi ingase itholakale ngasekupheleni kwalo nyaka ophezulu.
Phakathi kwezigemegeme ezazenzeka ngesikhathi besagijima kwiWanderers uVuma azikhumbulayo, yilapho belibangise ukuyodlala umdlalo weligi eGoli, uKingdom Mngomezulu wayeqala ukugibela ibhanoyi kuthe (ibhanoyi) selihamba phezulu esicongweni kwaqhamuka intombazane iphethe ukudla njengenjwayelo, uMngomezulu amuzwe esemuqhweba ngehlombe ehleba esethi:
“Yazi mfowethu bengingaphethe mali, bengingazi ukuthi kuyakhokhwa lana.” UMfeka uthi waphendula ngobukhulu ubuchule wathi kuMngomezulu: “Khululeka ngizokukhokhela.” Washo la mazwi ekubeni ebhanoyini kungakhokhwa ngenxa yokuthi uMngomezulu wayeqala ukugibela ibhanoyi, wayengazi ngakho uMfeka wasebenzisa lelo thuba.
UMfeka uthi ihlaya elamcisha umoya yilelo ngesikhathi belungiselela umdlalo weligi ababezowugijima noMlazi Citizens eKing Zwelithini Stadium, eMlazi. Uthi bathathwa yizikhulu zeWanderers bayiswa enyangeni thizeni ukuyoqiniselwa lowo mdlalo, batshelwa yinyanga ukuthi uma bephuma endlini bangalinge babheke emuva ngoba kuzomosheka umuthi.
Uthi nebala baphuma endlini yenyanga sebelibangise eMlazi, kuthe sebengena ekhumbini abahamba ngayo, kanti ngebhadi labo lapho kupakwe khona ikhumbi kumele bahlehlele emuva, inkinga enkulu isibhekene nawo wonke umuntu ngoba umshayeli kumele abheke emuva kwaba yinkinga enkulu ngoba kwaba wukuphela komyalelo wenyanga. Nokho uthi ngenhlanhla enkulu yabo lo mdlalo bawunqoba.