Uyathuthuka ocwala izinwele zemvelo
KUMVULE ingqondo kwamkhuthaza ukwaliwa ngamakhemikhali asemithini yokwelula izinwele owesifazane wasoNdini njengoba kumenze wagcina esezenzela imikhiqizo yemvelo ehambelana nezinwele zabamnyama futhi waba nezindawo ezintathu zokucwala izinwele.
UNkz Nontsikelelo Magwaza (34), ongumnikazi wemikhiqizo yemvelo enakekela izinwele ezingaluliwe, ebizwa ngeMrs Hairfidence, uyisungule emuva kweminyaka eminingi engaphatheki kahle uma kade ecwalwa izinwele.
Uthi bekuze kuphoqe ukuba agunde. Namuhla izindawo zakhe zokucwala zibalwa nezihamba phambili eThekwini. Izindawo zakhe zihanjelwa ngomntakabani nabantu abangazimisele ngokufaka imithi enamakhemikhali ezinweleni zabo.
“Kusukela ngo-1997, ngangiba nenkinga uma ngifake umuthi wokwelula izinwele okwaholela ekubeni ngivele ngiyeke,” esho.
Uthi waqala wenza ucwaningo ngokuthi angazinakekela kanjani izinwele zesintu, okuyilapho wafunda khona ngo-oyela abahlukene agcine esebathenga ebahlanganisa, wabasebenzisa.
Wahlanganisela nabanye abantu labo oyela ayebasebenzisa, abanye bebephinda babuye bayofuna abanye, bethi izinwele zabo ziphatheka kahle. “Ngagcina sengibahlanganisa ngibadayisa ngoba ngibona ukuthi ngiyashona uma abantu ngibenzela mahhala,” echaza. Uthi kwahamba isikhathi wabona ukuthi kubalulekile ukuthi lo msebenzi awuthathe njengebhizinisi, okuyilapho waqala khona ukuba namakhasimende aqondile. Ngaleso sikhathi uthi
wayesebenzela inkampani ekhiqiza utshwala, iDiadro SA, eyi- process technician.
Uthi umbono wokuvula izindawo zokucwala izinwele waqhamuka namakhasimende akhe ethi yize ekwazi ukusebenzisa imikhiqizo yakhe, kodwa kawazitholi izindawo ezicwala izinwele ezingaluliwe.
“Ngabona ukuthi leli yithuba engingalisebenzisa ngiziqalele ibhizinisi, kodwa ngaleso sikhathi ngangizitshela ukuthi kuzobalula nje ukuthi ngiqashe abantu abazosebenza nami ngibe ngiqhubeka ngisebenza,” kusho yena.
Izingqinamba ezaqubuka ebhizinisini ngoba engazibambele mathupha uthi yizona ezaholela ekutheni agcine eseshiya umsebenzi. Uthi lokhu kwaba nemithelela emihle kakhulu.
Ibhizinisi lakhe lachuma, lagcina selizala ezinye izindawo ezimbili.
“Inkinga enkulu kuqale kwaba yindawo yokwenzela ibhizinisi. Bengingafuni ukulivula edolobheni, bengilifuna endaweni lapho ngizokwazi ukunakekela khona namakhasimende angazwani nesiphithiphithi.
"Indawo yokuqala ngiyivule eMorningside ngo-2018 uqala,” kusho yena. Njengamanje ibhizinisi lakhe liqashe abantu abawu10 ngokugcwele, okubalwa nomuntu omlekelela ukwenza imikhiqizo aphinde asebenze kulezi zindawo zokucwala izinwele.
Phakathi kwemikhiqizo ayenzayo, yi- shampoo - athi uyihlanganisa ngezandla zakhe - ehlanza iphinde iqinise izinwele, o-oyela ababili abathambisa izinwele balaphe isikhumba sasekhanda, yimoisturiser athi ithambisa izinwele ukuze zinganqa
muki.
Eminye imikhiqizo yakhe uthi ine- coconut oil athi iyinkosi ekunakekeleni izinwele. Uthi iphupho lakhe elikhulu wukuthi izindawo zakhe zisabalale iNingizimu Afrika yonkana, ngokunjalo nemikhiqizo yakhe itholakale ezindaweni ezahlukene.
“Ngiyafisa ukuba nohlelo kumabonakude ngelinye ilanga, ngifundise ngokunakekela izinwele zesintu,” kusho uNontsikelelo.
Uthi kubalulekile ukuba abantu besifazane, ikakhulukazi intsha, bazifundise ngokunakekela izinwele zesintu futhi bakwazi ukuzivikela ikakhulukazi uma kushintsha isimo sezulu.
"Lokho kakusho ukuthi abesifazane abafaka izinwele noma abazilulayo kabazithandi, kepha labo abakhetha ukuzigcina zingenziwe lutho, kubalulekile ukuba nabo baziqhenye ngalokho,” kusho yena.