Akahlonishwe esadla anhlamvana uShenge
MHLELI: Kwelakho elingakhethi, ngithi njengesakhamuzi sentando enhle esesiphile iminyaka oNdini, KwaZulu-Natal, ngaphansi kwesizwe seNkosi Mangosuthu Buthelezi, ngesikhathi sisakhula, sasilandiswa ngobabamkhulu ukuthi ungubani lo Shenge.
Mina ngingomunye wabaholi beNational Freedom Party (NFP) abahlubuka kwi-IFP, kodwa okungenzi ukuba ngihlale phezu kweqiniso elithi baningi ontanga nabadala kunaye uShenge ababelwela inkululeko asebehlonishwe ezingxenyeni zezwe, kodwa uma kufika kuye kunuke ukukhuluma.
Kulabo baholi singabala uMnu Oliver Tambo, uMnu Walter Sisulu nabanye. Kasiphiki ukuthi bayilwela inkululeko, kodwa uShenge abantu wabapha inkululeko ephelele ngokuthi ngesikhathi iqembu elibusayo, i-ANC lithi makuzabalazwe ngezikhali, yena wathi imfundo phambili, umzabalazo ngemuva.
Waba yisibonelo ngokwakha izikole nohulumeni waKwaZulu ukuze izingane zabantu abampisholo zifunde ngesikhathi sodlame. Kwakusuka izingane zabaholi be-ANC abaqavile eGoli zizofunda KwaZulu.
UShenge wadlula lapha wakha iMangosuthu Technikon (eseyabizwa ngeMangosuthu University of Technology) eMlazi. Le nyuvesi akayakhanga oNdini.
Wasungula izimboni koSthebe (eMandeni) nakoZakheni (eMnambithi), wakha izikhungo zemfundo ephakeme ezingxenyeni zesifundazwe.
Wasungula ibhange i-Ithala elalingasizi abantu basoNdini kuphela, wavikela umhlaba weNgonyama hhayi oNdini kuphela, wasungula ikolishi lokuqeqesha amaphoyisa oNdini elalingaqeqeshi abasoNdini kuphela.
UShenge akakaze ame eMfolozi athi bangaweli abanye, ngisho ekolishi laKwaGqikazi kwakugcwala abafundi bakude.
Sekungowani umsindo nifuna ukuthi mhla-ke okaMathole esethule nibhale nizikhalise nithi makalale ngokuthula?
Kuyobe kuvelaphi lokho kuthula ningamnikanga emhlabeni ukumbonga ngegama nje likamasipala (njengoba kuke kwaba nomsindo kuhlongozwa ukuba kuqanjwe uMasipala wesiFunda waseMzinyathi ngegama likaShenge)?
Sekuwumsindo wani njengoba uShenge engeke athole nesenti ngegama, kuwukuthi sibonge iqhaza lakhe nje kuphela!
Siyafisa uhulumeni kazwelonke umhloniphe uMntwana waKwaPhindangene (iNkosi Buthelezi) ngokuba uqambe ezinye izakhiwo ngaye esaphila. Nawo uHulumeni waKwaZulu-Natal ngoba ungaphezu kobuqembu.
Iqembu elibusayo laliphakamise ukuba kube nohulumeni owodwa kazwelonke, nguMntwana waKwaPhindangene owathi izwe kuhle libe namabhodwe amathathu, uzwelonke, izifundazwe nomasipala; ngabe kwaMzinyathi kawukho ukube kwakungeyena umntwana.
Kuhulumeni womntwana akukaze kusungulwe ikhomishana ngenxa yenkohlakalo. Leli zwe lihloniphe amaqhawe amaningi ayezabalaza nomntwana, afela ngaphandle kodwa yena akaze aye ngaphandle, wahlala obala eNkonjeni wahlupheka nesizwe wavikela isithunzi sikaZulu.
Uma nilokhu nithi imisebenzi yakhe ngakini kaniyazi, thathani indiza nizulazule nibale izikole ezakhiwa wuhulumeni waKwaZulu nezakhiwe wuhulumeni wentando yeningi; nibheke nezibhedlela, impendulo niyoyithola.
Masingabandlululi umntwana ngento nje elula, ubuholi boMzinyathi benza into okumele ngabe kade omasipala bayenza, bahlonipha uShenge. Nami ngishoda ngendawo yami ngabe ngiyiqamba ngaye esaphila.
Ukuba kuyenzeka bengiyoqamba ngaye umuzi wami. Ngiyazi abantu babuka mina njengomholi owayephambili kwiFriends of VZ nasekusungulweni kweNFP futhi osekhaleni lokuba iNFP ikhule, kodwa lokho akusho ukuthi sengikhohliwe ngezinto uShenge azenzela mina nobaba.
Ngafunda eMashiyane Primary School eyakhiwa nguye. Noma ngabe iKwaZulu-Natal ibizwa ngaye, besiyobe siyibuyisela kumniniyo, uyisebenzele ukudlula bonke. Makavele ongathi uyamdlula.