UMBIKO WOKUNGENELELA EKULWENI NEGCIWANE LE CORONA WOMKHANDLU WASE NKANDLA
Isikhathi esibhekene nomphakathi waseNkandla sibukeka sizoba lukhuni njengoba umkhuhlane owumashayabhuqe uhlasele izwe lonkana. Umnyango wezempilo lapha eNkandla usukuvezile ukuthi sekunabantu abayishumi asebeqinisekisiwe ukuthi sebesulelekile ilomkhuhlane owaziwa nge Corona virus. Umkhandlu waseNkandla ube ngomunye weyokuqala ukuhlahla indlela yokungenelela kulesisikhathi esinzima. Nakuba saziwa njengomkhandlu onakekela kakhulu izakhamizi zawo, kodwa isimo esingase sibhekane naso ngenxa yalolukhuvethe singenza singakwazi ukulekelela umphakathi wethu ngendlela. INkandla ikhahlamezeke kakhulu ngezibalo eziphezulu zabantu abangasebenzi nokuyinto eyenza isimo sendlala sibesibi kakhulu ngalezizinsuku kuliwa nomkhuhlane i- Covid- 19. Umkhandlu wethu wase Nkandla wavakashela Izinhlangano zamatekisi ukuyo qwashisa ngawo lomkhuhlane futhi wanikezela ngezihlanzi magciwane ( sanitizers) ezingamakhulu amahlanu kosomatekisi. Savakashela irenki enkulu yalapha eNkandla edolobheni, savakashela irenki yase Lindela kanjalo ne renki yakwa Dolwane. Saqhubeke nokuqwashisa umphakathi ezigodini eziyikhulu namashumi amabili nesithupha zalapha eNkandla, sizungeza ngemoto enomyalezo oqoshiweyo onamazwi eMeya yomkhandlu uKhansela Thami Ntuli ukufundisa umphakathi wakithi ngezindlela zokuzivikela kulolubhubhane. Siqhubekile sasabalalisa izihlanzi magciwane emakhosini akhele indawo yaseNkandla kanye nabaholi bamabandla. Uma kuyizinsuku zokucosha izibonelelo, kunamathimba omkhandlu ahambela zonke izindawo ukuyo fundisa ngalomkhuhlane oyingozi futhi kuphinde kukhuthazwe ukuqhelelana kwabasuke bemi emigqeni. Abasuke behambela lapho kuholelwa khona izibonelelo, basuke bephethe zona izihlanzi magciwane behlambisa izandla labo abasuke beyohola izibonelelo . Abazizamela iphalishi ngokudayisa emigwaqeni nabo bahlomula ukudla okuyizindodla nezihlanza magciwane. Isizathu sokubasiza ukuthi ngesikhathi sikathaqa ( lockdown) ayikho inzuzo abayicoshayo, noma lokho kwaholela ekuboshweni kukaSodolobha nabanye abaholi bomkhandlu besolwa ngokuphula imibandela kathaqa. Silekelele kakhulu nangokuthi ihhovisi lethu lezokuthuthukisa umnotho wendawo lingavali ukuze sisize osomabhizinisi bethu ngezimvume zokusebenze ngalesisikhathi uhulumeni esebavumele ukuba baqhubeke nokudayisa emigwaqeni. Siphinde salekelela imifelandawonye ikakhulukazi leyo ethungayo ngokuyixhasa ngezindwangu ukuze ithunge izamfonyo izidayisele amalungu omphakathi. Imindeni engacoshi entweni nayo iyaqhubeka nokuhlomula ngokudla , eminye icosha amaphepha okuthola ukudla ezitolo ( food vouchers). Umkhandlu usukhiqize izamfonyo eziyizinkulungwane eziyishumi nesithupha ( 16 000) ezisabalaliswa nomphakathi wonkana ikakhulukazi labo abahlonzwe njengabasengozini kakhulu ngenxa yeminyaka noma ngenxa yamahlalakhona. Ukuqinisekisa ukuziphatha kahle komphakathi umkhandlu ubambisene namaphoyisa baba nezivimba mgwaqo, babuya bavakashele namabhizinisi ukuqinisekisa ukugcinwa kwemibandela kathaqa. Lomkhankaso usuholele ekuboshweni kwabaphula umthetho kwaphinde kwabanjwa nezimoto zokwebiwa. Iminyango kahulumeni ihlangana njalo ngolwesibili usuku evikini ukucosha imibiko kanye nokubuyekeza izinhlelo zokungenelela. Emhlanganweni obumhlaka 2 June 2020, umnyango wezempilo uqinisekise ukuthi sebekhona asebehaqwe ilomkhuhlane eNkandla. Lokho kugcizelela ukubaluleka kokuziphatha kahle okufanele kuqinisekiswe umuntu wonke owakhele izigodi zaseNkandla. Njengamanje kunokwesaba kakhulu emphakathi njengoba kuzovulwa izikole ikakhulukazi umatikuletsheni ngoba lapha eNkandla ngenxa yezinga eliphezulu lemfundo ezikoleni ezithile ezinjengo Bizimali, Lushaba, Velangaye, kunezingane eziningi eziqhamuka ezindaweni eziningi kuyoyonke iNingizimu Afrika. Lokhu kusho ukuthi uma kungenzeka kubekhona ezingane esezisulelekile ngalomkhuhlane, kuzodaleka isimo esinzima kakhulu emphakathini. Izingane zesikole zihlala zimbondelane emiqashweni okuyinto engabeka izimpilo zazo ezingozini kakhulu. Indawo yase Nkandla inezakhamizi ezingaphezulu kwezinkulungwane eziyikhulu nanhlanu, kodwa inezibhedlela ezimbili nje vo, okuyisimo esingabanzima kakhulu uma sebebaningi abantu abasuleleka ngalomkhuhlane. Sanxusa wonke amakhansela ethu ukuba enze imibiko ngezindawo ezingenawo amanzi ukuze sikhulume nesifunda i- King Cetshwayo silekelele abantu bakithi ngamanzi. Sikwenza lokhu nakuba sazi ukuthi isifunda sethu sihamba kancane kanjani ekuhlinzekeni umphakathi ngamanzi. Udaba lwamanzi sisalubukela eduze kakhulu ukuze uma abantu bakithi bengasizakali sibone ukuthi singenze lutho yini nakuba kungewona umsebenzi wethu ukunikezela ngamanzi. Ithimba lethu elibhekene nezinhlelo ze COVID- 19 eliholwa uMhlonishwa uMeya uNtuli lisebenza ngokukhulu ukuzikhandla libheka isimo somphakathi wakithi.