ABAFUNDI BANIKELELWE NGOMFANISWANO
KUCHONYWE uphaphe legwalagwala Abangani Bikers Association in KwaZulu-Natal ngokuthi bethi bedlala ngezithuthuthu kodwa babuye babheke emphakathini, belule isandla lapho benamandla khona.
Ngeledlule Abangani bahambele eChibelihle Combined School, eSwamp, eMpendle beyonikela ngomfaniswano ezinganeni eziwu-80 ezihlonzwe njengeziphuma emakhaya ahlwempu. Lapha bekunikelelwa izingane kusukela kwa-Grade R kuze kufike kuGrade 12, ebezithola umfaniswano uphelele kusukela onyaweni kuya phezulu.
Ekhuluma egameni laBangani Bikers Association in KwaZulu-Natal, uMnu Nhlanhla “Maphepha” Zuma, uthi ukuqhwizisa kwabo izithuthuthu kakusiwona umdlalo ngoba zonke izinkinga ezibhekene nomphakathi bayazazi futhi nabo ziyabathinta njengoba beyingxenye yawo. Uthe lesi sikole abebesihambele naye wafunda kusona, ngakho ubenesifiso sokwenza umnikelo omuhle kubafundi. Uthi bakwazile ukuhlanganisela izingane eziwu-80 ngethemba lokuthi nabazali bazo bazokujabulela abakwenzile.
UMnu Bonginkosi Dlamini onguSihlalo wesigungu esilawula eChibelihle Combined School, ubonge okwenziwe yile nhlangano nabafundi abadala balesi sikole abanikelele izingane ngomfaniswano.
Uthishanhloko wesikole uMnu Nkosinathi Gcaba, uthe lokhu okwenziwe kubafundi besikole asibhekile kuzolekelela ekuphunguleni umthwalo wabazali njengoba kudingeka bahlinzeke izingane zabo ngokudla, babuye bababhekele umfaniswano wesikole. Uthe abanye babo kabasebenzi, baphila ngemali yesibonelelo sazo lezi ngane.
Ekhuluma egameni lozakwabo uZola Duma ubonge abakwenzelwe ngaBangani Bikers Association, ethi isandla sidlula ikhanda bengabafundi ngoba sebezofana nabo bonke abanye uma besesikoleni.