IYANGIKHATHAZA EYOKUNGAPHEPHI NOKUNGCOLA KWAMADOLOBHA AKWAZULU-NATAL
MHLELI, iyangikhathaza indaba yokuxathuka nokungaphephi kwezingxenye ebezidlisa kakhulu eThekwini ngesikhathi leli lizwe lisaphethwe nguhulumeni wengcindezelo nangesikhathi abampisholo besanda kuthatha umbuso.
Phambilini bekuhambeka kamnandi edolobheni laseThekwini ngaphandle kokwesaba ukunyathela indle kwezinye izingxenye, kungekho mshobingo onuka cishe kuwo wonke amakhona emigwaqo ehanjelwa ikakhulukazi ngabantu abamnyama, uvalo lungekho lokubanjwa inkunzi emini libalele.
Namuhla leli dolobha seliphenduke isidleke salaba bantu abadume ngokuthi ngamaPhara, abangenqeni ukukhipha umphefumulo ngoba befuna umakhalekhukhwini nje qha, futhi nawo bezowudayisa ngemali engatheni ukuze bathenge lo doti abawubhemayo obizwa nge-whoonga.
Indawo yasePhoyinti beyivelele eminyakeni edlule njengoba ibidlisa ngeThe Wheel, ebihanjelwa kakhulu kuyobukwa ama-movie, inezindawo zokudla ebeziseqophelweni eliphezulu futhi iyinhle ngokuba seduzane nebhishi kwabakhonze ukubhukuda.
Namuhla le ndawo isiphenduke isidleke sikathekwane esabonwa yiSilo uZwelithini (esikhotheme), esathi umhlaba kayisemkhulu sewagcwala amavununu noma amalivilivi alenga kuyo yonke imigwaqo.
Uhulumeni wethu uma ungayinaki indaba yenhlanzeko nokugcinwa kwamadolobha esesimeni esihle, ezokuvakasha zizoshayeka ekubeni kuhlale kuthiwa zimqoka kakhulu ekufukuleni umnotho.
Phela akekho umuntu ofuna ukuhambela indawo engcolile futhi enobungozi. Lena kakuyona inkinga yeTheku nje kuphela kodwa ngeyawo cishe wonke amadolobha akulesi sifundazwe iKwaZulu-Natal.
Make sizithande siyindlu empisholo.