OMAMA BEZINGANE BATHWELE KANZIMA NGOBISI NAMANABUKENI
SEBECABANGA ukuphephela etiyeni omama bezingane ngenxa yobunzima bokuthola ubisi, okudalwa wukwenyuka kwamanani alo ezitolo, yisibalo okumele basithenge ezitolo nokuthi-ke lutholakala kude njengoba izitolo eziningi zibhunqiswe ngomlilo ngenxa yodungunyane.
Iningi likhala ngokushoda kwamanabukeni, ubisi nokudla kwabantwana. Lezi zibhelu zilehle ngenhla, kalizange lisithole isikhathi sokuthenga okuthe xaxa, kwazise inkinga iqale sekuphakathi nenyanga.
UNkz Xoliswa Mkhize waseNewlands West, eThekwini, onomntwana onamasonto amabili ezelwe, uthe akazi ukuthi uzothathani ahlanganise nani.
Utshele ILANGA ukuthi ubelethe ngeSonto kanti kuzoqala lezi zibhelu ngoMsombuluko. “Ngisalelwe yiphakethe elilodwa kuphela lamanabukeni, uma kwenzeka ziqhubeka izibhelu, angazi umntanami uzoba yini.
"Ubisi lwebele kanginalo, selokhu ngaqala ukuluzama ngisasesibhedlela, ngiyaphuza nokuphuzwayo okusamaphalishi, kodwa akuphumi lutho. Umntwana ugcina esekhala, edonsa ebeleni kungaphumi lutho.
"Ekhaya bangithengela ubisi oluncane ngoba bebona le nkinga engibhekene nayo, engingazi ukuthi luzophelelaphi nalo,” kusho uNkz Mkhize.
UNkz Hlengiwe Nkosi waseMvini, eMkhambathini, onomntwana onezinyanga eziwu-8, ukhala kakhulu ngobisi.
“Abantu bamoshile kakhulu, kasazi ukuthi sizothengaphi ngoba nasema-tuck shop kawekho amanabukeni nobisi. Into engisizile wukuthi nginamanabukeni ayithawula, okwenza kube ngconywana, kodwa uma ubisi luqhubeka nokushoda, kuzomele aphuze noma itiye iRooibos, akukho engingakwenza,” kusho uNkz Nkosi.
UNkz Samukele Duma waseManzimtoti, uthi kumphathe kabi ukubona umama okhulelwe esitolo ethi uyoqoqa okomntwana ngoba unovalo lokuthi izinto zingase zimshodele.
"Mina ngiwatholile amaphakethe amabili amanabukeni, yize ngihlukumezekile ngalokho. Kwezinye izitolo uvumeleke ukuthenga iphakethe elilodwa, la engithenge khona kwaClicks ngithole amabili, ngazithola sengihujwa ngabesitolo esiwumakhelwane bethi bafuna ukubona irisidi, bethi ngiwathenge kanjani amabili.
"Ubisi nalo ngilutholile, kusize ukuthi umphakathi wendawo engihlala kuyo ubuzigadele izitolo. Yize kunjalo, kuthengwa kanzima ngoba izimpahla zimbalwa kanti baningi abazidingayo,” kuphetha yena.