IJAJI LIFUNA UMSHOLOZI ETHULE UBUFAKAZI NGE-VIRTUAL
ABAMELI bakaMnu Jacob Zuma sebeveze ukuthi ufuna ukwethula ubufakazi bokuthi kungani icala abhekene nalo lenkohlakalo kumele lihoxiswe ngaphandle kokuqulwa.
Ngokusho kweNEWS24, uMnu Bethuel Thusini omele uMsholozi, ngoMgqibelo ufake isicelo esiyisipesheli sokuthi kuhlehle ukuqulwa kwaleli cala.
Ukufakwa kwalesi sicelo kuqhamuka ngemuva kokuba iJaji laseNkantolo ePhakeme yaseMgungundlovu, uMnu Piet Koen, liphakamise ukuthi ukuqulwa kwecala likaMnu Zuma kwenzeke ngohlelo lwezobuchwepheshe lwesimanje (virtual).
IJaji Koen ngeledlule lithumele ama-email kubo bonke abathintekayo kuleli cala nokuthi liqulwe ngalolu hlobo ngenxa yokuthi leli lizwe lisesigabeni sesine sokuvalwa kwalo.
Uveze ukuthi esinye isizathu salokhu wukuthi leli cala livamise ukuhlanganisa abantu abaningi ngaphakathi nangaphandle enkantolo, ngakho kungaba kuhle liqulwe ngale ndlela.
Uphinde wadalula nokuthi iningi labameli abahamba leli cala basuka esifundazweni iGauteng, yingakho enza lesi siphakamiso.
IJaji Koen lithe selike laxhumana nabasejele laseMtshezi (Estcourt) ukuthola ukuthi ngabe linayo indlela yokuthi uMnu Zuma akwazi ukuqula leli cala ngalolu hlobo ekulona ijele.
Ngakolunye uhlangothi uMnu Thusini uthe ufake isicelo sokuthi leli cala lihlehle ukuze uMnu Zuma akwazi ukuzifikela mathupha enkantolo azokwethula ubufakazi. UMsholozi kuthiwa usamile ekutheni leli cala kumele lihoxiswe njengoba ethi i-NPA ngeke ikwazi ukumshushisa ngoba ichemile, ayizimele.
Kuthiwa uNxamalala useke wakuveza ukuthi uma inkantolo ingenzi okulungile, ngeke asebenzisane nayo. I-NPA nayo isamile ekutheni izikhalo zikaMnu Zuma mayelana nokuhlukumezeka nokugxambukela kwepolitiki ecaleni lakhe, sekuke kwabhekwana nazo ngesikhathi inkantolo ichitha isicelo sakhe sokuhoxiswa kwamacala akhe.