IFU ELIMNYAMA KUDLULA OWAYENGUMPHATHI WOSUTHU NGAMA-90
IFU elimnyama kwezemidlalo KwaZulu-Natal kudlula emhlabeni uMnu David Dlamini (86) (osesithombeni) owake waphatha AmaZulu FC - agijima kwiDStv Premiership - kusuka ngo-1985 kwaze kwaba u-2002.
UMnu Dlamini udlule emhlabeni ngoMgqibelo kanti izindaba zokudlula kwakhe ziqinisekiswe yindodakazi yakhe uNkz Sthembile Dlamini, ethe uyise ubenesifo sikashukela, okuyisona esigcine simthathile.
Ngesikhathi leli qembu eliyigugu laKwaZulu-Natal liphethwe nguMnu Dlamini, laguqiswa kowamanqamu weIwisa Charity Spectacular ngo1987 yiKaizer
Chiefs ngo-3-2 (aweChiefs eshaywa nguMarks Maponyane noPule "Ace" Ntsoelengoe amabili - awoSuthu eza noNeil Tovey noJoel Faya).
Laphindwa yiyona iChiefs ngo-10 wegoli likaMaponyane kowamanqamu weMainstay Cup ngawo u-1987. Ngo-1990 uSuthu lwahlulwa yiJomo Cosmos kowamanqamu weBob Save Super Bowl ngo-1-0 wegoli elangqofelwa enethini nguJohn Salter.
Lwaba yizingqwele zeCoca Cola Cup ngo-1992 lubhaxabula iKaizer Chiefs ngo-3-1 wamagoli kaGeorge Dearnaly, Simon Magagula noEphraim Mwale - eleChiefs leza noJohannes Phadime.
Ngonyaka olandelayo lwaqeda lulele endaweni yesithathu kwi-log eyayisabizwa ngeNational Soccer League (Castle League).
UMnu Dlamini obengusomabhizinisi, ushone esethathe umhlalaphansi kanti uke waba yikhansela kuMasipala waseMthonjaneni ngethikithi le-IFP, okuyilapho agcine ukusebenza khona.
ILANGA lithinta uPat “Shabba Ranks” Gumede owayegijima kumaZulu ngezikhathi zikaDlamini, uthe:
“Inhliziyo yami ibuhlungu ngokudlula emhlabeni kukaDlamini. Wayenezifiso ezinhle ngekilabhu, ezifana ncamashi nezikaSandile Zungu ongumengameli wamaZulu manje.
"Wayenesifiso sokubona AmaZulu ehlonishwa eNingizimu Afrika. Wayehlala enathi, esigqugquzela ngaso sonke isikhathi. USuthu lwenza kahle kakhulu ngesikhathi sakhe, sengathi umndeni wakhe ungaduduzeka.” Ngesikhathi sakhe oSuthwini kwakugqame abadlali okubalwa kubona uFaya, uSazi Ngubane, Magagula, uJoe "Nyaka-nyaka" Mlaba (ongasekho), uTim Nzoyi, uDearnaley, u-Owen "Ace" Nzimande, uMwale noShadrack Biemba (ongasekho).
UMengameli wamaZulu, uMnu Sandile Zungu, uthe bazwelana kakhulu nomndeni kaMnu Dlamini ngokushiywa yinhloko yekhaya.
Ududuze umndeni wathi sengathi ungathobeka amanxeba.
UNkz Dlamini uthe basazohlangana bewumndeni ukunquma usuku lokufihla uyise kanti angase afihlwe ngoLwesithathu noma ngoLwesine kwakhe eNkonjeni, oNdini.