OMAKHELWANE BAKHELE ISALUKAZI ESINTULAYO INDLU ENTSHA
ZENZE okwehlula izikhulu zikahulumeni nezimpunyela izakhamizi zaseMaotana, eVerulam, zihlanganisa o-R100 ukuze kwakhelwe isalukazi sendawo ebesesilale efokozini iminyaka engaphezu kuka-20.
Luphelile usizi lokulala ebalisa ukuthi hleze kuse esepitshizwe yizindonga uNkz Alexia Ncayiyane (78), obehlala endlini enezimbobo, ngenxa yomakhelwane abaqunge isibindi bashaya amaphakethe.
UNkz Sthembile Mnguni ongomunye womakhelwane bakaNkz Ncayiyane, uthi bathinteka kakhulu uma bebona isimo sendlu ebihlala umuntu osekhule ngale ndlela.“Ugogo wangibiza ngelinye ilanga engikhombisa isimo sendlu yakhe.
"Ngazama ukumtholela usizo kwenye yezinkampani ezinkulukazi ebezilekelela abantu ngokubakhela, kodwa yaveza ukuthi kayisakwenzi lokho.
"Ngabiza abanye omakhelwane ukuba bayobheka isimo sendlu kagogo. Cishe bonke baphuma bethukile ngenxa yesimo sayo, sabe sesiya emhlanganweni lapho savumelana ngokuthi sonke sizokhipha u-R100 kuye phezulu ukuze sizothenga izinto zokwakha.
"Iningi lomakhelwane layikhipha le mali, sathola nabanye abasixhasa ngezicabha, abanye bakhipha imali ethe xaxa kunalena esasivumelene ngayo sabe sesiyamakhela,” kusho yena.
UNkz Ncayiyane ubonge wanconcoza komakhelwane ngabamenzele khona.
Utshele ILANGA ukuthi impilo ibinzima kakhulu kule ndlu abehlala kuyona, njengoba bekuthi uma lina aphoqeleke ukugudluza impahla, athandazele ukuba indlu ingawi.
“Isimo besisibi kakhulu. Ngibonga kakhulu komakhelwane bami, sengizokwazi ukuhlala ngikhululeke ngoba lena enye ibingawa noma yinini ngenxa yesimo sayo,” kuzibongela uNkz Ncayiyane.