Akekho obenolwazi lokuthi sizobhekana nefu elinjena
IMPILO isijwayeze izinto eziningi okuthi uma zenzeka sisheshe sibeke izizathu, okunye sibe nezimpendulo okufanele vele zibe khona ngaphandle kokucabanga. Okwenzeke emasontweni amabili edlule, ngisho ingane ingasho ukuthi yini imbangela yakho.
Kunezinto esiyaye sithi uma sizicabanga, kokunye abanye baziphimisele bathi zizokwenzeka, kumbe kungenziwa njani uma zingase zenzeke uzwe kubakhona abakuphikayo lokho.
Selokhu kuqale u-2020 kuze kube u-2021, ngibona izwe selishaywe yimibani emithathu ilandelana, kodwa nakho kuvikwe sekwenzekile. NgoNdasa (March) 2020 iCoronavirus esasiyizwela kude, yangena yagadla.
Kwaba ngokokuqala iNingizimu Afrika ivalwa thanqa, kwama nse izinto eziningi. Kwathi sisabheke lokho, lavulwa kwaphenduka amatafula, kwaqubuka indaba yowayengumongmeli wakuleli, uMnu Jacob Zuma ngamacala akhe.
Mahlayeni mahlayeni kwathiwa uzoboshwa, nempela wagcina eboshiwe. Kakuphelanga sikhathi eboshiwe, izifundwaze ezimbili iKwaZulu-Natal neGauteng zaphenduka inkangala yomlilo.
Njengenhlalayenza, kangethukanga uma impendulo iba seduze, kuthiwa kunabantu abawu-12 okuyibona abadale lonke lolu dweshu, oyedwa wabo usebanjiwe.
Ukungqongqa kwalezi zifundazwe ezimbili ezinye zilandele ngemithonseyana - kwachitheka igazi - nanamhlanje akubuzwa kujulwe ukuthi lezi zehlakalo ezintathu ezenzeke ngokukhulu ukushesha, zibangelwe yini.
Kasikabheki nokuthi kungani e-Afrika sibe yizwe elishaywe wuhlobo lweCoronavirus, iDelta variant, ukulandela i-India.
Ngithi mangikubalule lokhu ngoba kumuntu ojulayo, azindle kabanzi - angangeni ngaphansi komcabango webhokisi lepolitiki, kumbe lokuchema ngaphansi komthelela othile wokucabanga kodwa okucabanga kwakhe kuyazimela - nguyena ongakwazi ukuthola zonke izimpendulo zalokho okwenzekile.
Inkinga enkulu emhlabeni jikelele, wukuthi siba nezimpendulo esihlale sinazo, kuthi noma into ivela, singacabangi seqele ngale kokucabanga. Kunezinto esizenzile nesidlulile kuzona, ezinye zenzeka kithina uqobo, kodwa sabona ziphambene nokujwayelekile, sangahlala phansi saziveza kumbe sazicubungula ngoba impilo esiyiphilayo kayihambisani nalokho.
Ngizokwenza isibonelo esilula, sisuka kude nokulwelwa ubulungiswa, kwafa abantu, kodwa kwangabakhona kuhlambulekelana nokuthelelana amanzi.
Namhlanje sihleli ezindlini esazithenga kade zihlala abamhlophe esasisempini nabo, namhlanje sihamba ngezimoto emigwaqweni eyakhiwa ngabanye bethu abamnyama njengezigqila, kuyibona ababekhona ukunqamula kwaleyo mizila ngokwaleso sikhathi, kodwa namhlanje akunakiwe kokho.
Sigibela amabhanoyi ayebunjwe yibona, silalela imisakazo ezindlini lapho kusakazelwa khona kwakhiwa yibona, ukukhanya okwenzeka sesilele - esithi wugesi - kwenziwe kwaphehlwa yiziphehlelelo zabo, akwenziwanga yithina ngezethu izandla kuze kube namhlanje.
Sithe noma sesingena kuleyo mizila, sangena siphithene simaqembuqembu, isandla sabo silokhu sisebenze njalo isinyelela. Uma ekhaya konakele, kusheshe kubhekwe umnumzane njengomholi ukuthi kungani umndeni wehlelwa ngamashwa afana nalawa.
Kulapho umnumzane egjima aye esibayeni eyobuza koyisemkhulu ukuthi ngakube uthintephi lapho bekungafanele khona njengalokhu sekufa wena nkomo, kusha wena sangcobe nexhiba imbala.
Akuthathwa isikhali kuyobuzwa kungakaqalwa ezaleni eliyisibaya nezalukazi nazo zinikezwe ithuba lokushaya imishayo, kubuzwe. Kuwona lowo mnyama, kunabadala emndenini abakhuluma emuva kwezindlu, bathi kufanele kube njena, kabasazi ukuthi kwenzekani emndenini okuwumkhokha.
Umnumzane akasakukhumbuli lokhu nalokhuya okungalungiswangwa, okungenzeka ukuthi yikhona osekubaphendukela? Kuthi-ke noma kuhletshwa emuva kwezindlu, kube kukhona abathi makuyiwe amhlahlweni, akuvele kugijinyiswe izimpendulo ezingekho.
Umbuzo uthi ukhona yini owayazi ukuthi kuyoba khona isifo esifana neCovid-19? Ukhona owayazi ukuthi izwe liyoke libe ngaphansi kwaleli fu elikulona?
Ezinkulumweni zikababa uCredo Muthwa, ziyavela izimpendulo noma lokho wakusho ngesikhathi sobandlululo.
Akekho omnyama owathi esengena esikhundleni wakucabanga, njengalokhu na-mhlanje sekwenzeka. Okufanele ngikusho, lesi simo sizolokhu siza ngezindlela ezahlu-kene, ngabantu abehlukene, kuyo-ze kushaye u-2035.
Uma kuwukuthi silindele impilo ezinzile nenomnotho omuhle, masibuyele emuva mhlazane uMnu Nelson Mandela eqala ukubonisana nabamhlophe ngenkululeko yakuleli zwe.
Kulapho konakala khona konke esikubona namhlanje. Ake sihlukane nezimpendulo, kodwa masibuyele emuva sijule. Bhedlindaba “VVO” Ka Lu Phuzi Mkhize. UMengameli/Msunguli: we-Umsamo Institute Iisgodlo SasaMlambomunye: School of African indigenous Science.