Lihlehlile icala lePSL elibekwe iRoyal AM
Kusabhekwe isinqumo senkantolo ngolwemidlalo yokuhlunga
LIHLEHLELE umhla ka-24 kuNtulikazi (July) kophezulu icala elibekwe iRoyal AM egijima kwiGladAfrica Championship, ethweswe lona yikomiti eliqondisa izigwegwe lePremier Soccer League (PSL).
Leli cala belihlalelwe ngoMgqibelo eGoli kodwa sangaphuma isinqumo.
USesi Baloyi SC weMxenge Attorney’s ebimele iPSL, uphakamise ukuthi leli cala lihlehliswe njengoba i-AM ephethwe nguShauwn Mkhize (osesithombeni) isanecala elingakaphothulwa eSouth Gauteng High Court.
Kuleli cala i-AM imangalele uMato Madlala oyisikhulu esiphezulu esibambile sePSL, imsola ngokugunyaza ukudlalwa kwemidlalo yama-play-off ekubeni le kilabhu ibisenecala eliqhubekayo enkantolo.
Leli cala le-AM ebelisingethwe nguJaji uLeonie Windell, lingenile ngoLwesithathu kodwa iNkantolo yasigodla isinqumo.
Lokhu yikhona okwenze uBaloyi wathi akuhlehliswe ukuhlalelwa kodaba lokuqondiswa kweAM ubugwegwe ngoMgqibelo ngoba kusenecala eliqhubekayo.
Konke lokhu kugqigqisana ezinkantolo kwenzeke ngemuva kokuhlonzwa kweSekhukhune United njengezingqwele zeGladAfrica, ekubeni ngokwasenkundleni i-AM kusongwe iligi iqhwakele.
Ukungasonjululwa kwalolu daba kungaphazamisa imidlalo yePSL kwazise kuzokube sekusele izinsuku ezingu-6 kuqale imidlalo yesizini entsha.
I-AM kayizange ibe yingxenye yemidlalo yokuhlunga, izeseka ngokuthi uJaji uSelby Nyathi waphakamisa ukuthi udaba lwayo lulalelwe eNkantolo, iphikisa isinqumo seJaji uHiton Epstein owaphasisa ukuthi iSekhukhune iyizingqwele zeGlad-Africa. ISekhukhune kuvela ukuthi seyiqalile ukwenza amalungiselelo esizini entsha yize lolu daba lusesezinkantolo.
UQOPHE umlando eba ngumgijimi wokuqala omnyama waKwaZulu-Natal ukufakwa esikwatini esiyomela elakuleli kuma-Olympic Games aqala ngomhla ka-23 kwephezulu eJapan.
UZakithi Nene (23) (osesithombeni) waseMnambithi, ungomunye wabagijimi abavundululwe wubuholi obudlule beKwaZuluNatal Athletics (KZNA) obebuholwa nguSello Mokoena. Ngaleso sikhathi ubehlala endlini yabagijimi ebiseGlenwood eThekwini, egcine isiwumhhume ngenxa yokunganakwa.
Uzokube enza ibanga lika-400m ne-4x400m. UWillie Mtolo wake waqokelwa kuma-Olympic Games ango-1992 eBarcelona, eSpain, wagcina engahambanga ngenxa yenkinga eyamvelela. Kuzokhumbuleka ukuthi kwakuwunyaka wokuqala iNingizimu Afrika yamukeliwe emidlalweni yomhlaba.
UZakithi utshele ILANGA ukuthi ujabule kakhulu ngokuqokelwa eqenjini lesizwe eliya kulo mqhudelwano omkhulukazi kwezemidlalo emhlabeni.
"Inhloso yami enkulu wukugijima okungenani ngize ngifike kweyokuhlungela eyamanqamu.
"Engingakujabulela wukwenza isikhathi esizongifaka kumaWorld Athletics Championships angonyaka ozayo e-United States of America (USA)," kusho uZakithi.
Ebangeni lika-400m lo msubathi uzokube ebhekene nozakwabo uWayde van Niekerk (28) ophethe irekhodi lomhlaba kuleli banga. UZakithi uqokelwe kuma-Olympics nje, usanda kuba yingxenye yeWorld Relay ebisePoland ngoNhlaba (May).
Kwi-4x400m uZakithi ungene esikwatini sama-Olympics ehambisana noLythe Pillay oyijuniya, u-Oscar Mavundla noRanti Dikgale emidlalweni yasePoland. Nokho njengoba kuyiwa kumaOlympics nje, kungenzeka bafake uWayde van Niekerk kuleli thimba le-relay yize ebengekho ePoland.
"Ngicabanga ukuthi sizokwenza kahle kwi-relay. Ukuba yingxenye yomjaho wasePoland kungifundise okuningi," kusho uZakithi owenza iziqu zeBusiness Management eNorth West.
UMengameli weKZNA uSteve Mkasi, ufisele uZakithi okuhle njengoba eyingxenye yama-Olympics. Ubonge umqeqeshi wakhe uVictor Vaz.