ABESIBHAKELA KULELI SEBELUNGISELA AMA-OLYMPICS KA-2024
BUTHEMBISA ukulungisa amaphutha ubuholi beSanabo aholele ekutheni kungabi bikho ngisho ibhokisa elilodwa laseNingizimu Afrika elizobamba iqhaza kumaOlympic Games azoqala mhla ka-23 kwephezulu asongwe mhla ka-8 kuNcwaba (August) eTokyo, eJapan.
Abadlali abazomela izwe kule midlalo bamenyezelwe ngeledlule. Amabhokisa akuleli kawayanga ezimpini zokuhlunga eSenegal ngenxa yezinkinga ebezihaqe ubuholi obudala bale nhlangano.
Ubuholi besikhashana buhlele imidlalo yokuqoka amabhokisa sekuzophela unyaka odlule eDundee. Lapha bekukhethwa amabhokisa abezokuya ezimpini zokuhlunga eParis, eFrance. Lezi zimpi kazibange zisaba khona ngenxa yeCovid-19. Lokhu-ke kuchaza ukuthi amabhokisa akuleli azoyibuka komabonakude le midlalo.
USiyabulela Mkwalo onguMengameli omusha weSanabo, uthi sebebheke imidlalo yama-Olympics ezokuba ngo-2024 eFrance.
“Isikhathi sethu ehhovisi sizophela ngo-2025. Sesiqalile ukuhlela kahle izinhlelo zethu. Inkinga wukuthi siphazanyiswa yiCovid-19. Kumanje siphoqelekile ukuhlehlisa imidlalo obekumele ibe seCape Town kule nyanga.
“Lapha besizokhetha isikwati esizolungiselelwa amaCommonwealth Games azokuba ngonyaka ozayo e-England. Sesihlele ukuthi leyo midlalo ibe ngasekupheleni konyaka, kanti nakhona kuzokuya ngokuthi sesimi kanjani isimo ezweni.
“Abadlali abazosimela e-England sizobagcina ukuze bavivele ama-Olympic Games ango-2024. Ngicabanga ukuthi lucace kahle lolu hlelo esisebenzela phezu kwalo,” kusho uMkwalo.
Uthi izinsiza zasehhovisi kazikabuyi ebuholini obudala njengoba bugweve nazo.
“Lolu daba sesilubikile ezinhlakeni eziningi kodwa kaluxazululeki. Sigcine sivula icala esiteshini saseSunnyside. Silindele ukuba amaphoyisa asibikele ngokuqhubekayo.
"Kunezinto ezimqoka esizidingayo ezibhajwe ebuholini obudala. Lokhu kwenza kube nzima ukusebenza.
"Ngaphezu kwalokhu, siphinde sajuba ikomidi lethu lezomthetho ukuba kube yilona elisebenza lolu daba,” esho.