Sibonga amavolontiya alekelele ukuhlanza ezitolo ezilimele
NAMHLANJE siletha izindaba ezimnandi kubalandeli bamaZulu Football Club zokuthi sekuseduze ukuthi iqembu limemezele abadlali abazoba semabhukwini alo kule sizini ezoqala.
Siyakuqonda ukuthi abalandeli bafuna ukwazi ukuthi ibaphi abadlali abasha abasayinisiwe nalabo abazodedelwa ngokuqala kwesizini ka-2021/2022. Maduzane bazokwazi.
Izinhlelo zethu zithe ukuphazamiseka nokho ngenxa yokungena kwezwe esigabeni sesine sikathaqa wokulwa nokubhebhetheka kwegciwane iCoronavirus.
Kuphinde kwaba khona esinye isiphazamiso okube wukusuka kwezibhelu ezifundazweni iKwaZulu-Natal neGauteng kulandela ukugwetshwa kwalowo owayenguMengameli wezwe, uJacob Zuma okumanje udonsa izinyanga ezingu-15 ngenxa yokutholakala enecala lokushaya indiva umyalelo wenkantolo.
Kule mpelasonto esiphuma kuyo iqembu lamaZulu ngokubambisana nePhumlani Dube Foundation lihambele ezinye zezinxanxathela zezitolo ezikhahlamezekile kulolu dlame lokutapa nokucekela phansi impahla.
NgoMgqibelo sihambele eMlazi Mega City, eningizimu yeTheku, kwathi izolo ngeSonto saya KwaMashu Shopping Centre, enyakatho yeTheku.
Esikuficile kusimangazile njengoba amavolontiya abeqoqa udoti ebefike ngezinkani nakuba azi kahle ukuthi ngeke athole ngisho indibilishi ngokwenza lo msebenzi.
Isikhalo esikhulu kumavolontiya abekade esiza ekuqoqweni kukadoti bekuyinto eya ngasethunjini.
Kuzokhumbuleka phela ukuthi izitolo eziningi zicekelwe phansi zaphinde zashiswa emalokishini amaningi, okwenza kube lukhuni satshe ukuthola izidingo kubantu bakulezi zindawo.
Umculi nomlingisi odabuka eMlazi, uSandile Dlamini odlala indawo kaPhakade Bhengu odume ngelikaShongololo emdlalweni kamabonakude Imbewu, ungomunye wamalungu omphakathi abekhona ukuzofaka isandla eMlazi Mega City.
UDlamini uthe ukubone kubalulekile ukuthi abe yingxenye yalokhu njengesakhamuzi sakuleli lokishi. Ube esehlaba ikhwelo lokuthi umphakathi ulungise ingqalasizinda emalokishini awo ukuze kuzobuyiselwa umnotho esimweni esifanele.
UHlengiwe Hlengwa odume ngelikaMroza ubekhona naye, emele abalandeli bamaZulu begatsha laseMlazi.
UBongumusa Cele oyilungu lo mphakathi khona eMlazi uthi yena into emenze wasukuma wazibandakanya nalo mbhidlango wokulungisa isimo ukuthi ubone isidingo sokuthi kufanele kube khona abantu abazoba yizibonelo ezinhle phakathi kwethu.
Uthi kube buhlungu kakhulu ukubona inxanxathela yezitolo yangakubo ilimele ngaloluya hlobo.
Lo somabhizinisi ube esenikela ngokudla nokunye okuphuzwayo obekunesidingo kakhulu kumavolontiya abesebenza.
Lo mbhidlango udlulele KwaMashu Shopping Centre izolo lapho obekukhona khona noMengameli woSuthu imbala, uSandile Zungu, ephelezelwa abaqondisi beqembu oSinenjabulo Zungu noManzini Zungu.
UQedi Dlamini oyimenenja yeqembu naye ubekhona kanjalo noBrilliant Mkhathini. Abalandeli beqembu begatsha laKwaMashu bebephume ngobuningi bezoqoqa imfucuza beholwa uSithembiso Ngcobo.
Usihlalo wekomidi labalandeli kuzwelonke, uJoe Hlongwa naye ubekhona. Siyazigqaja njengeqembu ukuba nabalandeli abayisibonelo esihle emphakathini.
Asibonge nakusomabhizinisi ovelele waseThekwini, uZodwa Msimang we-Ikhono Communications ne-Ikhono Foundation. Naye uthe ngeke asale ngaphandle. Nangempela ukwazile ukuhlanganyela nathi KwaMashu ehamba nezisebenzi ze-Ikhono Foundation, ezifike nokudliwayo nokuphuzwayo obekuvele kudingeka kakhulu.
Nathi njengeqembu lamaZulu sibe sesinikela ngokuyiswa ngasethunjini okwenze omkhulu umehluko kumavolontiya.