UZOVELA NAMUHLA ENKANTOLO UZUMA
ZIBONGA iphoyisa ebese lishayisile emsebenzini, ezithi lizitakule emlonyeni wengwenya zigencwa ngocelemba yizakhamizi zasePhoenix, eThekwini izelamani zaseBhamshela, eNdwedwe, uMnu Simphiwe Zondi noMnu Mthabiseni Zuma.
Kumanje zilulamela ekhaya emuva kokuphunyuka kulezi zakhamizi ezazivimbe umgwaqo njengoba bekunezibhelu.
Zithi zishiselwe ngisho imoto kulesi sigameko. Zithi iphoyisa lidele impilo yalo yize lingazazi, labalamulela kulezi zakhamizi ebezingezwa mshini, zisho ukuziqeda ngocelemba.
Ngokuthola kweLANGA, uMnu Zondi nomfowabo - abebehamba nengane eneminyaka ewu-14 ubudala - bebelibangise eNanda beyofaka uphethiloli njengoba bebezwe ukuthi kunendawo otholakala kuyona, kwazise amagalaji amaningi ashisiwe. Bathi basaba ngisho ukuphindela bayobheka izinsalela zemoto yabo.
UMnu Zuma uthi usazibuza ukuthi ngabe yini le abebeyenzile ebingenza baze balinyazwe ngale ndlela.
“Sisuke ekhaya kusakhanya, silibangise eThekwini. Ngenxa yokuthi imoto ibisizophelelwa wuphethiloli, sibone kungcono ukuthi sidlule eNanda siyowubheka. Sithathe indlela enqamulelayo, edlula ePhoenix, kanti sizozithela ezakhamizini zakhona zivimbe umgwaqo.
"Zisibuze ukuthi siyaphi, emuva kwalokho zasesha imoto zathola isibhamu sikamfowethu esisemthethweni. Zisuke lapho zamngenela ngocelemba zimgenca. Kwale ngisho sengizichazela ukuthi isibhamu sisemthethweni namaphepha akhona. Zimshiye enabile zadlulela kimina zangingenela ngenduku.
"Kuqhamuke amaphoyisa amabili nawo afike asithela induku, yize bengithi ngicela usizo kuwona njengabantu bomthetho. Ngesikhathi umfowethu eselele phansi, ingane ziyixoshile.
"Kudlule enye imoto yama ngaphambidlana kwalapho besishayelwa khona, kwaphuma owesilisa oyiphoyisa ofike wangena phakathi kwethu nalezi zakhamizi, wazikhuza.
"Ubatshelile ukuthi ngeke azivumele zisibulale njengoba esinye bese sibeke isibhamu saso ekhanda lami, sithi siyangiqedela. Zisiyekile, leli phoyisa lasiphuthumisa esibhedlela," kusho yena.
Kwenzeka lokhu nje, uNgqongqoshe wamaPhoyisa, uMnu Bheki Cele uhambele ePhoenix naseBhambayi ukuzama ukukhuza lo mhlola oqhubekayo.
Uphinde waveza ukuthi sekutshalwe amaphoyisa awu-80 ukulekelela awakuleya ndawo, kwakhishwa abaphenyi abawu-10 abazophenya ngezigameko zokubulawa kwabantu okuvele ukuthi bawu-20 ababulewe kuleya ndawo.