Bageqa amagula abasinde ePhoenix
Izisulu zithi zabhunyelwa nagodizili sebefuna ukuzingqongqisa
BAGEQA amagula abesilisa abane nowesifazane oyedwa baseNanda, abaphunyuke emlonyeni wengwenya ngoMsombuluko odlule ngesikhathi umphakathi wasePhoenix, eThekwini, ubahlasela, ubasola ngokuba yizigebengu, maqede wathungela ngomlilo itekisi abebehamba ngalo.
Bathi behlelwe yile nkanankana ngemuva kokusuka kwezibhelu zabantu ababezitapela ezitolo, ezaqutshulwa ngabalandeli bakaMnu Jacob Zuma. Bathi baya ePhoenix nje, babeyothenga izidakamizwa endaweni yabo abajwayele ukuzithenga kuyona.
Kulesi sigameko kwashona uMnu Njabulo Dlamini - okwakuhanjwa ngetekisi yakubo - owashaywa waze washona. Abasindile nguMnu Sanele Marese (28) - ongumshayeli wetekisi, othi uyokhohlwa efile ebona izidumbu zabantu zilahlwe ehlathini aphaphama kulona, khona ePhoenix - uMnu Sandile Sambo (36), okwakuhanjwa ngetekisi asebenza ngayo, uNkz Linda Khawula (22), uNkosi Madlala (23) noMthobisi Ntuli (24).
ILANGA lihambele abasindile, abanye babo abasalele phansi ngenxa yokulimala. Bonke basazibuza ukuthi baphunyuka kanjani njengoba bethi umphakathi wakuleya ndawo wawuqonde ukuqeda ngabo, usho uthi ubafuna befile.
UMnu Marese uthe: "Sasiwu-6 emotweni siyothenga izidakamizwa zethu esizidlayo. Sangena ePhoenix umphakathi uvimbile, kodwa wangasinika inkinga. Safika la esithenga khona, kwehla umuntu oyedwa eyothenga, samlinda emotweni. Kwakukhona notshwala sihamba siphuza.
"Uthe ebuya nje emotweni esethengile, kwaqhamuka iFord Ranger yasivimba. Ngemuva, kwaqhamuka iqulu lomphakathi liphethe izinduku nezibhamu, lasiphoqa ukuphuma emotweni, lasishaya. Kasikwazanga nokuchaza ukuthi kasizona izigebengu.
"Saphuma sonke sabaleka emotweni, uNjabulo wasala ngenxa yokuthi lesi gameko senzeka ezumekile. Saphuma sabaleka ngokwehlukana. Ngabaleka ngayongena ehlathini eliseduze, ngahlala khona kwaze kwaba phakathi kwamabili. Ngaphuma ngazama ukuthubeleza ngibaleka ngoba ngangingakalimali kakhulu.
"Ngazithela phezu kwelinye iqulu lomphakathi, langibamba langihlalisa phansi, langisola ngokuthi ngiyisigebengu, langishaya. Ngashaywa ngaze ngalunyiswa ngezinja. Nakuba ngisindile, ngasizwa wukuzenza umuntu ofile, ngangabe ngisakhala, nganganyakaza.
"Bangibopha izandla nezinyawo bangihudulela ehlathini eliseduze, kwase kuwuLwesibili ekuseni, sekuqala ukukhanya bengihudulela ehlathini beyongilahla khona. Ngethuka uma ngiphaphama kuleli hlathi kunezidumbu ezingaphezu kuka-5 eceleni kwami, zinamanxeba okushaywa nokugencwa emakhanda nasemzimbeni,” kusho uMnu Marese.
Uthi namanje usethuka uma evala amehlo ngoba kuvele kubuye le nto ayibona. UMnu Madlala uthi ngesikhathi bephuma emotweni bezama ukubaleka, washayeka okhalweni waphelelwa ngamandla, wangakwazi ukubaleka.
Uthi wasala endaweni yesigameko noMnu Dlamini noMnu Sambo. Emuva kwalokho bashaywa baze baquleka, wawuzwa umphakathi uthi mabashiswe.
"Waqeda ukusho lokho wasibhunyela ngodizili umzimba wonke. Imoto esasihamba ngayo yayisingqongqiswe ngomlilo. Waphazanyiswa wukuqhamuka kwemoto yamaphoyisa, wasimboza ngamapulangwe. Imoto yamaphoyisa yadlula eduze kwethu ngazama ukuphakamisa amapulangwe.
"Nakuba ngiyakhuluma namuhla, sasizwa yilokho, ngebhadi uNjabulo wayeselimele kakhulu. Asithatha amaphoyisa asiphuthumisa esibhedlela," kusho yena.
UMnu Ntuli noNkz Khawula bathi basindiswa wukubaleka bayongena esitolo sabokufika kuleli, ababathatha babavalela ngaphakathi. Bathi bahlala izinsuku ezimbili bevaleleke ePhoenix, bazama ukufonela imindeni yabo beyitshela okwenzekile.
“Ubaba waze waxhumana nomngani wakhe onomuzi ePhoenix, wasithatha wayosicashisa emzini wakhe. Emuva kwezinsuku ezimbili, bacela elinye ilungu lomphakathi lomdabu waseNdiya ukuba lisifake emotweni yalo, lisicashise, lisikhiphe kule ndawo," kusho uMnu Ntuli.
UMnu Sphiwe Madlala onguyise kaNkosi, uthi wathuka woma ebona ezinkundleni zokuxhumana indodana yakhe nabangani bayo beshaywa, bebizwa ngamasela.
"Isihlukumezile le nto eyenziwe wumphakathi,” kusho yena.
Uthi okubakhalisa kakhulu nokubenza baphatheke kabi, wukuthi kalikho icala elivuliwe ngale nto futhi kalikho nelilodwa iphoyisa elathatha izitatimende ezisulwini.
UNkz Makoti Khawula oyilungu lephalamende ngethikithi le-EFF, okunguyena olusukumele phezulu lolu daba ukuzisa abalimele bakwazi ukuvula amacala, uthi ibathintile le nto. Bonke laba abasindile bathi kalikho icala abalivulile emaphoyiseni, namaphoyisa abasiza kazikho izitatimende azithatha kubona.