IBALELWA KU-160 000 IMISEBENZI EZOLAHLEKA ETHEKWINI NAMAPHETHELO
IBALELWA ku-160 000 imisebenzi ezolahleka ngenxa yodungunyane lwangesonto eledlule, abantu bezitapela ezitolo, kwashiswa ezinye namafemu ngaphansi kukaMasipala weTheku.
Lokhu kuvezwe yiMeya yeTheku, uMnu Mxolisi Kaunda, ngesikhathi ikhuluma neLANGA.
UMnu Kaunda othi akahlonizi ukuthi weseka uMnu Jacob Zuma ezisuke ngaye lezi zidubedube uveze ukuthi iTheku lishayeke kakhulu.
Uthe ilinganiselwa ku-R1 billion impahla eyebiwe kanti amabhilidi ashisiwe nalinyaziwe umonakalo ulinganiselwa ku-R15 billion kanti kwi-GDP (okuyimali eyenziwa ngemikhiqizo nezinsiza) leli dolobha lilahlekelwe wu-R20 billion. Uphinde waveza nokuthi babalelwa ku-55 000 abadayisi abazimele abathintekile.
“Isimo esibhekene naso sinzima kakhulu njengoba lezi zigameko zenzeke sisemzamweni wokuvuselela umnotho ngemuva kokuvalwa kwezwe ngenxa yeCovid-19.
"Ngokuvalwa kwezwe, babalelwa ku-300 000 abantu abalahlekelwe yimisebenzi kanti lokhu okwenzekile kufane nokufaka usawoti esilondeni,” kusho uMnu Kaunda.
Uthe bazoqhubeka nohlelo obeluvele lukhona lokuvuselela umnotho weTheku oshayeke ngenxa yeCovid-19.
“Esesizokwenza manje wukuthi siluqinise kakhulu lolu hlelo ukuze sakhe umnotho ohlanganisa bonke abantu ngaphandle kokukhetha ibala,” kusho uMnu Kaunda.
Uthe baqale ngokuhambela zonke izindawo ezithintekile ukuze bahlole umonakalo odalekile, wagxeka izigameko zokucwasana ezibikwe ezindaweni ezahlukene ngaphansi kwalo masipala.
“Sihlanganile nemiphakathi ethintekayo saxoxa, sadala ubumbano.
"Siyathemba ukuthi imiphakathi izobambisana, kwakhiwe ukuthula ukuze sibhekane nempi eyodwa yokubuyisa nokuvuselela umnotho,” kusho yena.
Ukuchithile ukuthi ukuphumela kwakhe obala ngokweseka uMnu Zuma kubhebhethekise udlame.
Uthe usamile ekumesekeni lo mholi, okumanje usezikhindini. Uthi isinqumo sokuba esekwe, sathathwa yi-ANC KwaZulu-Natal.
"I-ANC KwaZulu Natal yanquma ukuthi simeseke uMsholozi, ngakho akukho okuphambene ngokuphumela kwami obala ngalokhu.
"Ukuthi ngiyameseka akusho ukuthi ngiphehla udlame,” kusho uMnu Kaunda.
Uphawule nangemibhikisho yamaphoyisa kaMasipala weTheku, abekhala ngokungakwazi ukusebenza ngokukhululeka kwezinye izindawo ngenxa yokuthi imiphakathi ibisizibambele umthetho.
“Sizizwile izikhalo zawo futhi sazisukumela njengoba ebekhala ngokuthi amanye amalungu emiphakathi abesenza kubenzima ukuthi akwazi ukuqhuba imisebenzi yawo,” kusho uMnu Kaunda.