I-IEC IZONIKELA ENKANTOLO IYOCELA KUHLEHLE UKHETHO
IZIMISELE ngokuya ezinkantolo ukuyofaka isicelo sokuba kuhlehliswe ukhetho lohulumeni basekhaya okumele lube mhla ka-27 kuMfumfu (October) i-Independent Electoral Commission (IEC), eyengamele ukhetho eNingizimu Afrika.
Lokhu kuvezwe yisekela-nhloko yamajaji eselathatha umhlalaphansi, uMnu Dikgang Moseneke, ebelijutshwe yi-IEC ukuba liphenye ukuthi ngabe lolu khetho luyoba ngolungenazihibe yini njengoba kuhlasele iCovid-19.
I-IEC ifuna ukuthi okungenani lolu khetho lube ngoNhlolanja (February).
UMnu Terry Tselane owayeyisekela likasihlalo we-IEC, ongomunye wabantu abebekhalela ukuba kuhlehliswe lolu khetho, uthi le nhlangano isebenzisa imali engaphezulu kuka-R400 milliom ukuhlela ukubhalisela ukuvota okuyaye kuthathe impelasonto yonke.
Ukubhalisela ukuvota kulolu khetho bekumele kuqale ngesonto elizayo. “Kubalulekile ukuthi amaqembu ezepolitiki nalabo abangenela ukhetho ngokuzimela, babe nesikhathi esanele sokuzilungiselela.
"Lokhu kusho ukuthi kumele babenesikhathi sokudlulisa umyalezo wabo kubavoti, bebazisa ukuthi kungani bebona kufanele kukhethwe bona,” kusho uMnu Moseneke.
Uqhube wathi i-IEC kumele iye ngokuphuthuma ezinkantolo iyofaka isicelo sokuhlehliswa kokhetho ngoba abaholi bomasipala (amakhansela) siyabaphelela isikhathi ekupheleni kwenyanga ezayo.
“Uma ikhomishini ikwamukela lokhu okutholwe wuphenyo, kuzomele kubewudaba oluthathelwa phezulu.
"Uma inkantolo ivuma, kumele uNhlolanja ungapheli kungavotwanga," kusho yena.
Ukhetho lokugcina lohulumeni basekhaya lwalungomhla ka-3 kuNcwaba (August) ka-2016.
Ngokuka-section 159 woMthethosisekelo waseNingizimu Afrika, akumele kuphele izinyanga ezingaphezulu kwezintathu labo okumele baphume ebukhanseleni bengaphumanga.
“Umkhandlu ophelelwe yisikhathi uyakwazi ukuqhubeka usebenze uma kunezivumelwano, akufani nomkhandlu osuke uhlakaziwe ngokuka-section 139.
Lo mkhandlu uzokwazi ukuqhubeka usebenze kuze kube kubekwa umkhandlu omusha,” kusho yena.
UMnu Moseneke uthi kubalulekile ukuthi ikhomishini isheshe iye enkantolo ukuyothola incwadi evumela ukuba kuhlehliswe ukhetho, okusho ukuthi imikhandlu ekhona izolulelwa isikhathi ngezinyanga ezintathu.
Amaqembu aphikisayo i-DA neOneSA Movement, athi leli yicebo nje lokuqhuba isikhathi sokuthi la maqembu akhona ezihlalweni angasuki.
Usotshwebhu we-IFP ePhalamende, uMnu Narend Singh, uthe njengeqembu bayawamukela lo mbiko njengoba ethi bona bebebona kufanele ukhetho luhlehliselwe uNhlaba (May), wonyaka ozayo ukuze izwe likwazi ukudlula kulesi simo elibheke naso.