UYAQHUBEKA UMKHANKASO WAMAPHOYISA WOKUQOQA IMPAHLA EYEBIWE
UYAQHUBEKA umkhankaso wamaphoyisa wokuqoqa izimpahla ezantshontshwa kwaZulu-Natal naseGauteng ngeledlule, ngesikhathi abantu bevuka umbhejazane begqekeza ezitolo betapa ukudla, ezinye bazishisa.
Kulo mkhankaso amaphoyisa angena umuzi nomuzi, ebheka izimpahla ezantshontshwa, athole ngisho ibhokisi lomngcwabo, imibhede, izinto ezisebenza ngogesi namathayi ezimoto.
UNgqongqoshe wamaPhoyisa, uMnu Bheki Cele, uthi njengoba amaphoyisa eqhuba lo mkhankaso osubizwa ngokuthi "Operation Khipha iSlip", kuye kuthi abantu bewabona, bazithathe lezi zimpahla abazebile bazilahle esigangeni bebalekela ukuthi zingatholakali ezandleni zabo.
Uthi emijondolo yaseMountain Rise, eMgungundlovu, uthi bekungathi ngamangcwaba ngesikhathi izakhamizi zale ndawo zilahla izimpahla zikanokusho esigangeni, zesaba ukukhalelwa ngamasongo kaSigonyela.
Izimoto ezinkulu zamaphoyisa ezine, zithuthe ziphindelela impahla yokwebiwa. “Kutholwe ibhokisi lomngcwabo eZinqoleni, esifundeni u-UGu. "Okwamanje akukacaci ukuthi ngesikhathi litholwa belinani phakathi. Kuthe ngoLwesibili amaphoyisa agasela eGlebelands, ehostela laseMlazi.
"Abahlali base-block 51 bavele baphonsa impahla entshontshiwe ngamawindi," kusho uNgqongqoshe Cele. Uthi lezi zimpahla ezintshontshiwe zizobekwa endaweni amaphoyisa agcina kuyo amazibithi.
Uveze ukuthi bazoba nomhlangano neNational Prosecuting Authority, ukubheka ukuthi kuzokwenziwani ngalezi zimpahla ezitholiwe.
“Kumanje le ndawo okugcinwa kuyo amazibithi igcwele, sisabheka indawo esingayisebenzisa njenge-warehouse yokuzigcina,” kusho yena.
Kwenzeka lokhu nje, isitolo sefenisha iSedgars esiseSpringfield, eThekwini, sicela ukufuniswa i-couch e-blue eyebiwa ngesikhathi kuqhubeka lobu bugebengu. Le nkampani ibifake lokhu ku-Instagram ithi icela ukufuniswa le couch, izimisele ngokunikeza oyitholile okunye okunganela endlini yakhe.
UMnu Marc van Olst ongumnikazi woPie City, uthi kucekelwe phansi izitolo zabo eziwu-13 kwaZulu-Natal.