UXOLELE "IZITHA ZAKHE" NGOKUNIKELELA ABAHLWEMPU OWAYENGUKAPTENI WE-PIRATES
USOLE abangani bakhe nabantu abamaziyo ngokugqekezwa kwesitolo sakhe esibizwa ngeGrootman, uLucky Lekgwathi owayengukaputeni we-Orlando Pirates, obengomunye wosomabhizinisi abamnyama abashayekile ngesikhathi kusuka izidubedube, kutatshwa ukudla ezitolo ezinye zishiswa ngeledlule.
IGrootman eseKliptown, eSoweto, yacekelwa phansi ngoLwesibili lomhla ka-13 kwephezulu. ULekgwathi - owake wadlala kwiReal Rovers neRia Stars kaRia Ledwaba, wabonakala nakwiBafana Bafana - utshele uNdunankulu waseGauteng, uMnu David Makhura, ukuthi indawo yakhe yagqekezwa ngabantu abangabangani bakhe nabaziyo kulezi zibhelu ezishiye kukhalwa
KwaZulu-Natal naseGauteng.
“Ngathola ucingo, ngitshelwa ukuthi abantu bayazitapela ezitolo eziseKliptown. Kangizihluphanga ngokuyobheka ngoba kwathiwa abatapayo kabekho kule nxanxathela yezitolo enesitolo sami.
"Kwathi kusaphele amahora ambalwa, ngathola ucingo oluthi sebetapa khona,” kusho yena.
Uthi ngesikhathi efika, kwakungasekho lutho esitolo sakhe. "Kubuhlungu lokhu ngoba kwenziwe ngabantu abangabangani bami nabantu abangaziyo,” kusho yena.
Lesi senzo sezigilamkhuba kasimvimbanga uLekgwathi ukuba abuyisele emphakathini, njengoba ngeSonto ebehambela imiphakathi eyehlukene, enikela ngamaphasela okudla nezingubo zokulala njengoba bekuwusuku olubizwa ngeMandela Day - okuwusuku okwazalwa ngalo uMnu Nelson
Mandela owaba ngumengameli wokuqala omnyama eNingizimu Afrika. Uthe lokhu ukwenzela ukukhombisa ukuthi abenzi bobubi uyabaxolela.
“Umyalezo engiwunikeze abantu abadala, wukuthi uma abantwana babo befika nezimpahla ezintshontshiwe, kumele kube yibo ababiza amaphoyisa,” kusho yena. UMnu Makhura uncome umphakathi olwe nokuhlaselwa kwengqalasizinda namabhizinisi.