Kunukwa abezipaza ngokuzitapela ezitolo
KUNUKWA abanikazi bama-spaza shop ngokugqekeza bazitapele ezitolo zaKwaNongoma, esigamekweni sangeledlule esishiye idolobha lisele nesitolo uSpar kuphela, njengoba abantu bebephume ngendlu ezindaweni ezahlukene, bezitapela ezitolo.
Lokhu kuvele ngesikhathi umkhuzi wamaPhoyisa kwi-cluster yaseZululand, uMajor General Thulani Gonya ehlangene nomphakathi nabaholi baKwaNongoma ngoMsombuluko.
IMeya yaKwaNongoma, uMnu Albert Mncwango (ongaphambili esitombeni) , ibikele uMaj. Gen Gonya ukuthi iningi losomabhizinisi ababanjiwe akubona abendawo, bebesuka kwamanye amadolobha.
“Iningi losomabhizinisi ababanjiwe abanye bebezisholo bona ukuthi ngabakuziphi izindawo, kanti abanye babanjiswe yizinombolo zezimoto zabo ngoba bezingafihliwe.
"Ngikhuluma nje, ezinye sikwazile ukuzibamba sazigcina khona lapha ngoba phela bezisetshenziselwa ubugebengu,” kusho uMnu uMncwango.
Kuvela ukuthi osomabhizinisi abaningi basebenzise ithuba lezidubedube ebezihambisana nemibhikisho yokuba kukhishwe ejele uMnu Jacob Zuma, bagqekeza KwaNongoma bazitapela ukuze bayodayisa emathilomu abo.
UMnu Mncwango uthi ababanjiwe bebesuka eNewcastle, eVryheid, oPhongolo, oNdini, eDlomodlomo nakwezinye izindawo.
Ngenxa yesimo sokuthi idolobha laKwaNongoma liguqile ngenxa yalo monakalo - akukho ngisho izindawo zokuba kuthengwe impahla eyisamba ukuze abanikazi bezitolo badayise - uMnu Mncwango uthi umasipala uqhamuke nohlelo lwesikhashana lokuthi osomabhizinisi bakwazi ukuyothenga impahla.
Uthi umasipala uvulele osomabhizinisi isakhiwo abazoyisebenzisa ukuze bakwazi ukubeka kusona impahla kanti nezitolo ezincane zizothenga kusona.
UMaj. Gen Gonya ukhombise ukushaqeka uma ebikelwa ukuthi idolobha ligcine lisha liba wumlotha phambi kwamaphoyisa okuvele ukuthi abekhona ezihlalele ezimotweni ngoba ethi kawanazo izibhamu nezinhlamvu zenjoloba nesisi esikhalisayo ukuze abhekane nezixhwanguxhwangu.
Uthe lolu daba bazolufakela izibuko ngokushesha ukuze kulungiswe lapho okonakele khona, ikakhulukazi ukulekelela amaphoyisa aKwaNongoma ngezinsizakusebenza. Kuthiwa kusize umphakathi namaphoyisa asoNdini ukuze kuvikeleke isitolo sakwaSpar namagaraji amabili kaphethiloli.